الركراكي: الأغلبية مرشحين فرنسا ولكن حنا عطشانين للرباح ويقدرو يقولو علينا مجانين

اكد الناخب الوطني وليد الركراكي أن اللعابا ديال المنتخب الوطني المغربي عندهم حافز كبير باش يربحو فرنسا غدا فنصف نهائي كأس العالم قطر 2022، ويتأهلو للفينال وأن أغلب التوقعات كترشح الفرنسيين ولكن المغاربة عندهم ثقة فريوسهم.
وقال وليد الركراكي فالندوة الصحافية اللي كتسبق ماتش المغرب وفرنسا: "إلى وصلتي لدومي فينال ومتعطشين باش نربحو ولكن السؤال هو واش هادشي غادي يكون كافي.. وي غادي يكون كافي مع روح الفريق وحنا واثقين فريوسنا والرغبة ديالنا هي نزيدو نكتبو التاريخ ونحطو القارة الإفريقية فصدارة العالم".
وكمل الركراكي وقال:"أغلب التوقعات هي فمصلحة الفرنسيين وكترشحهم ولكن حنا عندنا الثقة فريوسنا، يقدرو يوصفونا بالمجانين ولكن حنا عندنا ثقة كبيرة وراه ما فيناش لعيا واذا كانوا كيتوقعو بلي غادي يكون فينا العيا راه حنا ما عيانينش حيث ما يمكنش يكون فيك الإرهاق قدومي فينال كأس العالم"