من النقاط لكثيرة اللي هدر عليها مدرب الاسود وليد الركراكي اليوم الثلاث 13 دجنبر 2022 بالدوحة قبل ماتش نص النهاية ضد فرانسا غدا بملعب البيت٬ هو المورال ديال الاسود. مورال طالع وبزاف. "عارف باللي كاع التوقعات عطاتنا٬ كيف فالسابق٬ كانت ضدنا. ولكن حنا تايقين فريوسنا. يمكن حنا مصطيين. علاش اللا. مزيان يكون الواحد مصطي. نكولها ونعاودها. تايقين فريوسنا. وما عييناش. يمكن كيقولو باللي راه المنتخب عيى. اللا اللا ما عييناش. راه جيعانيين للرباحات وما عيينا والو. ما يمكنش لشي حد يعيى فنص نهاية كاس العالم". الركراكي اكد باللي خاص العقلية تتغير "جينا للمونديال باش نغيرو العقلية. عقلية لعابة القارة الافريقية اللي حنا منها" وشدد فالندوة الصحافية باللي الهدف ماشي هو نصف النهاية "انا ماشي متافق مع اللي كيقول باللي وصلنا لنص نهاية المونديال راه حققنا انجاز. ما وصلناش بالصدفة لهاد المرحلة باش نكونو من 4 الدول فالعالم. عندنا كلمتنا غدا باش نمشيو للفينال. غاديين نكونو فهاد ليطا ديسبري" وذكر باللي المنتخب لعب مع لكبار "يمكن كان عندنا الباركور الصعيب. كل مرة كيتكهنو لينا باش نخرجو ولكن ها حنا مازال هنا". وقال الركراكي باللي "من اللول قلت باللي كنحلمو نربحو المونديال. مع الماتشات هاد الحلم ولى قريب. غادي نضاربو غدا باش نحققو حلمنا".
