الركراكي ملي ربح المغرب بلجيكا: اللعابا تقاتلو واخا الإصابات وباقي ما درنا والو

عبر وليد الركراكي على الفرحة ديالو من بعدما ربح المنتخب الوطني المغربي بلجيكا اليوم الأحد فكأس العالم قطر 2022، بنتيجة 2 لزيرو، وأكد بلي مازال ما دارو والو وخاصهم يبقاو مركزين حتى يتأهلو.
وقال وليد الركراكي فأول تصريح ملي ربح المغرب بلجيكا: "قلت لكم ديرو معنا النية ونبدلو شوية عقلية الجمهور المغربي، راه اليوم الدراري تقاتلو صبرنا ضربنا تمارة خدمنا بزاف وخا عندنا إصابات فحكيمي مزراوي وبونو راه الدراري مقاتلين خاص غير المغاربة يثيقو فينا".
وبخصوص أبعاد الرباح على بلجيكا أكد وليد الركراكي: "باقي مدرنا والو عندنا 4 النقاط، نتسناو نتيجة كرواتيا وكندا، واللي مهم هو نتأهلوا، وخاصنا نسترجعو الطاقة ديالنا حيث عينا"