سايس: المهم ما توعت فينا حتى لعاب ضد جورجيا والرباح غادي يعطينا الثقة

أكد غانم سايس الكابيتان ديال المنتخب الوطني المغربي أن اللعابا فليكيب ناسيونال دارو ماتش مزيان ضد جورجيا اللي ربحوها بنتيجة 3 لزيرو وديا البارح فالامارات، وهادشي غادي يعطيهم الثقة قبل المونديال، وأهم حاجة هي ماتوعت حتى حد فيهم.
وقال غانم سايس فتصريح للموقع الرسمي ديال الجامعة الملكية المغربية لكرة القدم: "أهم حاجة هي درنا ماتش متزيان وما توعت حتى حد من اللعابا، وكلشي خدا الفرصة باش يلعب حيث كانوا شي وحدين فيهم محتاجين يلعبو ويرجعو الريتم حيث كانوا موعتين أو ما كيلعبوش مؤخرا".
غانم سايس تكلم على الجو فالامارات والطقس السخون وقال على أنه صعيب على اللعاب يتأقلم مع الحرارة ولكن فقطر غادي يكون داكشي أقل حيث التيرانات كليماتيزي، وقال بلي اللعابا عياو ضد جورجيا وخاصهم يرتاحو ويوجدو لماتش كرواتيا حيث مهم.