ميساج مؤثر من بنعطية لحارث وكيلمح لغيابو مدة طويلة على التيرانات ماشي غير فالمونديال

عبر الدولي المغربي السابق المهدي بنعطية على الدعم والمساندة ديالو لنجم المنتخب الوطني المغربي وأولمبيك مرسيليا الفرنسي أمين حارث اللي توعت البارح الأحد، وأكد بلي غادي تبقى بلاصتو فليكيب ناسيونال وففرقتو.
المهدي بنعطية تفاعل مع إصابة أمين حارث اللي العالم كامل تفرج فيه فماتش مارسيليا وموناكو، وهو كيغوت بسبب ألم الضربة اللي فركبتو، وقال الكابيتان السابق ديال المنتخب المغربي فانستغرام: "ااااخويا الصغير راني معك بقلبي فهاذ المحنة اللي كتدوز منها وراه عارف قوة الشخصية ديالك وقادر تتخطى هاذشي".
ولمح الدولي المغربي السابق المهدي بنعطية صاحب أمين حارث بلي نجم أولمبيك مرسيليا غادي يغيب مدة ماشي سهلة على التيرانات وقاله: "غادي نفتاقدوك فمارسيليا وفالمنتخب وطني المغربي وعندي ثقة فيك بلي غادي ترجع قوي".