الكوري سون نجم توتنهام تهرس فوجهو

غادي يدير الدولي الكوري سون هيونك نجم توتنهام الننكليزي عملية جراحية فوجهو بسبب إصابة تعرض لها ضد اولمبيك مرسيليا فشومبيونزليك، الشي اللي كيهدد مشاركتو مع كوريا الجنوبية فكوب ديموند.
وكشف توتنهام الننكليزي بلي المهاجم ديالو الكوري الجنوبي سون هينك، اللي توعت ضد مارسيليا وخرج فالشوط الأول من الماتش، غادر يخضع لعملية جراحية حيث تهرس فوجهو وبالضبط فالمنطقة اللي محيطة بعينه اليسرى.
توتنهام ما ذكرش المدة اللي غادي يحتاجها سون باش يرجع يلعب، وقال غير بلي غادي يبدا مرحلة عملية إعادة التأهيل مع الطاقم الطبي ديال النادي، وهو الشي اللي كيخلي الشكوك كتحوم حول مشاركتو فكأس العالم مع كوريا الجنوبية وواش يقدم يكون حاضر على الأقل فماتش من ليماتش ديال ليكروب خصوصا وأنه لعاب مهم فمنتخب بلادو اللي غادي يلعب مع أوروكواي والبرتغال وغانا فالكروب 8.