جبران كابيتان الوداد وجه ميساج للعائلة الودادية وهاشنو قال على مشاركتو فالمونديال

رسل يحي جبران الكابيتان ديال الوداد الرياضي رسالة شكر لكل من ساهم فتواجد الاسم ديالو فكأس العالم فقطر 2022، وساعدو حتى وصل للمستوى اللي فيه باش تمت المناداة عليه من طرف الناخب الوطني وليد الركراكي ووعد المغاربة بتقديم مستوى مشرف.
وقال يحيى جبران فتصريح للصفحة الرسمية ديال الوداد الرياضي: "باش تعطاك لفرصة تلعب كوب ديموند شي حاجة كبيرة بالنسبة ليا، وكنشكر أي واحد كان ورايا باش ندير الاسم ديالي اللي غادي يكون فالمونديال سواء عائلتي الصغيرة أو العائلة الودادية ومبروك علينا كاملين، ونتمناو نقدمو مستوى كبير نشرفو به الكرة المغربية والمغاربة كاملين".
للإشارة فيحيى جبران الكابيتان ديال الوداد الرياضي ساهم بشكل كبير فتتويج الواك الموسم الماضي بلقب وطني وقاري، حيث رفع درع البطولة الإحترافية وكأس دوري أبطال إفريقيا الشي اللي سهل عليه يكون مشارك فكأس العالم فقطر، من بعد المستوى اللي ظهر به مع الحمرا.