عطب فموقع "Casawe" برزط الوداديين وتيكي ماتش الوداد وريفرز مازال كيتباع

رجع الموقع الإلكتروني الخاص ببيع تذاكر ليماتش اللي كيتلعبو فستاد دونور لطرح تذاكر ماتش الوداد الرياضي وريفرز يونايتد النيجيري اليوم الأحد، من بعدما أكد فوقت سابق بلي تيكي سالا.
المنصة الإلكترونية "Casawe" رجعت خدمت مرة أخرى وطرحت قبل لحظات من جديد تذاكر ماتش الوداد وريفرز النيجيري، فالوقت اللي كانت قبل وقت قليل من صباح اليوم الأحد، كتأكد لأي واحد من جمهور الحمرا باغي يشري تذكرة بلي التذاكر سالاو، الأمر اللي خلف ارتباك كبير وسط أنصار الوداد اللي باغيين يحضرو المباراة.
للإشارة فماتش الوداد الرياضي وريفرز يونايتد النيجيري ضمن إياب دور 32 من دوري أبطال إفريقيا، من المنتظر يعرف حضور كبير لجمهور الوداد، حيث المباراة الحاسمة وخاص الفريق يربح باش يتأهل لدور ليكروب ويواصل حملة الدفاع على اللقب اللي ربح الموسم الماضي.