رعب وروينة كبيرة وقعات فرحلة جوية ديال "لارام" من ميامي لكازا والمسافرين شبعو غوات بعد 20 دقيقة من الديكولاج

عرفات رحلة جوية مباشرة بين ميامي ومطار محمد الخامس فكازا استياء وغضب كبير في صفوف المسافرين بسبب ما أكد أحدهم ل"كَود"، شي دورة ماشي هي هاديك وقعات بعد 20 دقيقة من إقلاع الطيارة ووقعات فظروف غامضة.
وقال أحد المسافرين فهاد الرحلة الجوية اللي كانت مع الخطوط الملكية المغربية بللي شي دورة خايبة دارتها الطيارة اللي البيلوط ديالها كانت مرا وقلعات من ميامي مع ال12 ديال النهار يوم الجمعة الماضي بالتوقيت المحلي.
المسافرين تصابو بحالة من الرعب والهلع، وطلبو من مسؤولي "لارام" باش يقدمو شروحات مقنعة على هادشي اللي وقع لكن حتى شي حد ماعطى شي تفسير منطقي على هاد الحادثة اللي كانت سباب فالخلعة اللي عاشو المسافرين.
مصدر من دخل شركة "لارام" هضرات معاه "كَود" نفى هادشي كلو، وأوضح بللي الحادث الوحيد اللي وقع هو الروطار ديال 6 دقائق لا أكثر وبللي كلشي كان عادي جدا.
لكن الحادثة المذكورة وقعات بصّح وعدد من المسافرين أكدوها وزاد قال أحد المسافرين بللي "لارام" كتكذب.