الامارات صرفقات الدزاير فمجلس الامن. رفضات تعيين بوقادوم مبعوثا امميا فليبيا وها علاش

الامارات العربية المتحدة عطات تصرفيقة قاصحة لحكام الجزائر. البارح رفضات مقترح قدمو الامين العام الاممي انطونيو گوتيريس بتعيين وزير خارجية الجزائر السابق صبري بوقادوم مبعوثا امميا لليبيا.
التبرير الاماراتي هو انو كاين قلق اقليمي من هاد التعيين لان الجزائر عندها حدود مشتركة كبيرة مع ليبيا.
هدا هو المبعوث التاسع اللي كان غادي يكون فهاد المنصب ف11 سنة لكن تصويت الاعضاء 15 البارح وقف بسباب الاعتراض الاماراتي. ديبلوماسي ل"ا ف ب" قال باللي غير الامارات بوحدها اللي رفضات تعيين الديبلوماسي الجزائري.
الامارات فهاد المجلس راها كتمثل المجموعة العربية وقالت باللي كاينة دول عربية واحزاب ليبية معارضة هاد التعيين. ما جبدوش هاد الدول. طبعا المغرب غادي كون من المعارضين.
الرباط عندها دور فهاد الملف وتعيين هاد الديبلوماسي الجزائري غادي يكون عندو اثر خايب على هاد الدور المغربي