وهي خايبة هاد ملكة جمال الجزائر اللي ردات على اللي قالو ليها انتي ما زويناش: ربي يهديكم” ولكن راه سبقونا حنا اللي ما قادرينش نديرو مسابقة ملكة جمال المغرب بلا غش

ملكة جمال الجزائر خديجة بنحمو ما زويناش. شي تصاور ديالها يا لطيف. نايضة عليها. كلشي كيتهكم عليها كيسب بيها. بنحمو ردات عليهم فحوار مع قناة جزائرية “اللي ينتاقدوني نقول ليهم ربي يهديكم”. واخا ما زويناش تايقة فراسها وقالت باللي تم اختيارها بسباب اخلاقها الطيبة وقلبها واحترامها للمتسابقات بالاضافة الى الاناقة والزين ولحلاوة
السيدة قالت باللي شاركات صدفة وربحات وباللي غادية توجد لملكة جمال الكون شهر جنبر المقبل.
المهم لمغاربة شدو فالجزائريين بزاف غير كاينة وحد الحاجة. حنا كانت عندنا مسابقة ملكة جمال وناض عليها الصداع وتوقفات ودارت محاولات اخرى. حنا فدولة فيها انفتاح اكثر هاد المسابقة ما عندناش ديال ملكة جمال المغرب. عندنا ملكة جمال حب لملوك وملكة جمال الورود يعني كاين تقاليد تقدر تخلينا نديرو مسابقة على حقها وطريقها. تكون مسابقات جهوية فالجهات 12 وتكون اقصائيات وتشدها شي قناة بحال دوزيم ولكن ما قدرناش. غير على هادي ما خاصناش نسبو ملكة جمال الجزائر. هما سبقونا واخا بوحدة خايبة