مأساة.. كاميو ديال النقل الدولي طحن حراك فوسط لميناء دلمسافرين فبني نصار-الناظور

واقعة مؤلمة عاشوها العمال ولأطر ديال ميناء المسافرين فمدينة بني أنصار فإقليم الناظور، بعدما طحن كاميو ديال النقل الدولي شاب فلعشرينيات من فئة الحراكة.
الشاب العشريني بعدما دخل للميناء دلمسافرين متسلل، جات لوقت باش يتعلق فلكاميو، ولكن لسوء الحظ فقد التوازن ديالو فلحظة كان الشيفور كيوجد يدخل للباطو، وطاح جا وسط روايض وكلا ضربة خايبة، قتلاتو فلبلاصة.
الواقعة استنفرات الأجهزة الأمنية لي خدامة فلمرسى لي حضرو لعين المكان بسرعة، فحين دات الوقاية المدنية جثة الشاب، لمستودع الأموات فلمستشفى الإقليمي دناظور، وتم فتح تحقيق تحت إشراف النيابة العامة المختصة باش يوصلو للأسباب الحقيقة لي مات بها السيد.