عاجل. بوليسي دخل للعناية المركزة.. تدخل أمني ضد حراكَة من إفريقيا جنوب الصحرا تضربو فيه عناصر أمنية نواحي الناظور

عاشت عشية اليوم غابة كوروكو، اللي كيتاخدوها مهاجرين من دول إفريقيا جنوب الصحرا ملجأ ليهم وكنقطة ما قبل العبور لمليلية المحتلة، (عاشت) استنفار كبير، كلاو فيه مجموعة ديال عناصر الأجهزة الأمنية العصا، وكاين منهم اللي الحالة ديالو خطيرة.
فتفاصيل الواقعة، وحسب مصدر مطلع، واحد البوليسي، كلا ضربة خايبة فالراس، بحجرة شيرو عليه بها بعض الحراكَة اللي كاينين فالغابة.
زائد 3 من الجوندارم، وعنصرين ديال المخازنية، حتى هما تقاسو فهاد التدخل، اللي جا فإطار حملة أمنية باش يجمعو فيها هاد الحراكَة اللي كيتم الترحيل ديالهم.
المصابين تنقلو بسرعة للمستشفى الإقليمي فالناظور، باش يتلقاو العلاجات الضرورية، بحيث دخل البوليسي المصاب لقسم العناية المركزة، حيث الحالة ديالو خطيرة، بسبب الضربة اللي جاتو فالراس.
وحسب المصدر نفسو، قال بللي التدخل جا فإطار الاستراتيجية اللي وضعوها المسؤولين الكبار اللي اجتامعو فعمالة الإقليم هادي 3 أيام، باش يتم الحد من ظاهرة الهجرة السرية فهاد المناطق خصوصا، ويتم استتباب الأمن على طول الحدود بين الناظور و مليلية المحتلة.