جثة لاحها البحر فكورنيش الناظور هاد الصباح والبوليس والجوندارم ماتفاهموش على شكون يتكلف بلونكيط

جثة شاب تلاحت صباح اليوم فكورنيش الناظور، نوضات روينة بين البوليس والجوندارم فالمنطقة، حسب مصادر محلية.
الأمن الخاص لكورنيش بحيرة مارتشيكا وسط مدينة الناظور، لقى جثة الشاب طافية جانب الكورنيش، هادشي خلاهم يتاصلوا بالبوليس، اللي جاو وبعدهم كان خاص يجي الدرك البحري اللي وقعات الحادثة في نفوذه وأيضا فنفوذ البوليس بما أن الغرق وقع وسط الما والجثة تلقات وسط المدينة.
حضور الجوندارم خلق مشكل بينهم مع البوليس وكل واحد فيهم كان باغي ياخذ الجثة ويحقق فالنازلة، وفالأخير النيابة العامة هي اللي فكات القضية وسلمات الجثة للبوليس وعطاتو الادأوامر باش يدير تحقيق فهاد الحادث ديال الغرق.
ويعتقد أن غرق هاد الشاب كان خلال محاولته للهجرة، وغير معروف إن كان الغرق يهم فلوكة عامرة بالحراكَة، أو أن الهالك كان ماشي فجيتسكي أو زودياك غا بوحدو.