وتا هاد الطاشرونات لملايرية راهم مفروحين. الزين مول "اتقان" دار الشيخات للفتوة العلام حقاش تابعوه الجدارمية فحالة سراح فالاعتداء على عائلات فبوزنيقة

علمت "كود" ان الزين مول "اتقان" ديال الدگيگ =المطاحن= دار البارح لاربعا 11 غشت 2021 الشيخات للعلام٬ صاحبو الطاشرون لملايري المتخصص فلهميزات خاصة ديال السيزي فشي ڤيلا ف"ايدين ايلند" فبوزنيقة.
ووفق مصدر "كود" فهاد الزين اللي كان سايگ واحد من الرابطورات اللي تسببو فمشاكل فهاد الاقامة. السكان والناس اللي فالبحر كانو احتجو علي الصداع وعلى ان هاد الشي ممنوع بن سليمان اللي تابع ليه البحر٬ فتعداو عليهم ولاد العلام ونسيبو مول اتاي بلخضر وهاد الزين مول "اتقان".
واحد اسمو المرنيسي وخدام ف"بي ام" شي مدير٬ كان واحد من هاد الثلاثة اللي سلخوهم ال العلام. قدم شكاية مدعومة بالشهود. البارح قررات النيابة العامة تابع العلام فحالة سراح بتهمة الضرب والجرح وتابع نسيبو كذلك فحالة سراح بتهمة المشاركة.
باش خرج هاد القرار٬ قرر مول "اتقان" اللي ما عرفناش علاش ما تجبدش فهاد القضية٬ ودار ليهم الشيخات. باش شي مواطن جارهم شاف باللي الوقت فات المسموح بيه قانونيا٬ عيط على الجدارمية وجاو. فاللول وفق مصدر "كود" داو التريتور اللي اسمو الزرقطوني مع الشوافرية ديالهم.
اللي غريب ان الجدارمية ما دارو والو مع مول "اتقان" اللي خرق التجول الليلي اللي كيسالي مع التسعود.