جوج محابسية ختاطفو موظفين وسط الحبس وباش يطلقوهم فاللخر طلبو "پيتزا كباب"!

عرف واحد الحبس في السويد حالة اختطاف ف شكل بعدما ناضو جوج محابسية واختاطفو جوج موظفين ورفضو يطلقوهم حتى يجيبو ليهم پيتزا باللحم ويفرقوها على كَاع المحابسية.
الحادثة بدات في نص الليل البارح بعدما دخلو جوج محابسية، محكوم عليهم في جرائم قتل واللي كايدوزو العقوبة ديالهم ف حبس قريب من مدينة "اسكلستونا" (Eskilstuna)، غرفة المراقبة و تمكنو من يشدو جوج من العساسة (راجل و مرا) و كانو عندهم جناوة صاوبوهم من قبل.
هاد المجرمين طلبو فاللول إيليكوبتر باش يهربو، وفاش بدات معاهم المفاوضات اللي شدات النهار كلو، تراجعو على الطلب اللول وقدمو واحد آخور غريب، وهو أنه غادي يطلقو سراح الرهينتين مقابل 20 "پيتزا كباب" باش يفرقوها مع صحابهم المحابسية لوخرين ف العنبر.
المفاوضات بقات 9 ديال السوايع وبقاو كايهددو بقتل الحراس وماطلقوهم حتى جابو ليهم "الفدية" اللي طلبو.
البوليس قالو أن القضية هي اختطاف والمحابسية ماضربوش المحتجزين وكلهم رجعو بيخير لديورهم.
مول الريسطو، اللي تكلف يوجد ال"كوموند" ديال هاد المساخيط، قال في تصريحات صحافية أنه صاوب 20 پيتزا والبوليس جاو داوها من عندو.