عاجل.. ترونات فسجن ورزازات: لمحابسية كيحتجو على انتشار "كورونا" والبوليس وصلو لباب الحبس خوفا من خروج الوضع على السيطرة

ترونات مساء اليوم الأربعاء فالحبس ديال ورزازات بسبب انتشار "كورونا" فيروس بشكل مقلق. وحسب مصادر "كود"، فإن المحابسية دارو وقفة احتجاجية، وحملو فيها المسؤولين كافة المسؤولية فهاد التطوات اللّي عرفاتها الحالة الوبائية.
الحبس ديال ورزازات اللّي تحول "بؤرة" للفيروس، شهد حسب مصادر "كود"، احتجاجات خايبة والمحابسية رفعو بزاف ديال الشعارات، ومن بينها "المحابسية فخطار"، قبل أن يعود الهدوء إلى المؤسسة السجنية.
البوليس وصولو لباب المؤسسة السجنية. تقول مصادر "كود" لكن بلا ميكون حتى شي تدخل. الهدف من تواجد الامن هو الحفاظ على النظام العام وخوفا بالي تمشي تخرج الأمور عن السيطرة ديالها.
وكانت التحاليل الطبية المخبرية اللّي بانت لحدود الساعة وتدارت على أزيد من 730، من بينهم 100 موظف ف الحبس ديال ورزازات، قد بينات أن 170 منهم يحملون "كورونا" فيروس. هاد الرقم ارتفع بعدما تسجلات 72 حالة جديدة.
وقالت مصادر "كود"، أن هاد المصابين الجداد كولهوم محابسية وشي مخالطين ديال الموظفين، مشيرة إلى أن الفرق الطبية المختصة تواصل البحث عن مخالطين آخرين باش تدير ليهوم التحاليل الطبية المعلوم بها والتأكد من مدى إصابتهم بهاد الفيروس.