إفريقي مات ف ظروف غامضة فكلينيك فوجدة وكنيسة خلصات عليه 65 ألف درهم

علمت "كود"، أن مهاجر إفريقي فالعمر نتاعو حوالي 22 عام، مات ف ظروف غامضة فكلنيك ف وجدة ، بعدما أدهورت الحالة الصحية نتاعو، وهاد الشي اللي خلا الكنيسة الكاثوليكية بالناظور كتخلص عليه مبلغ 65 ألف درهم.
وذكرت مصادر مطلعة ل"كود"، أن المهاجر الإفريقي كينحدر من الكوديفوار، وكان كيقرا ف جامعة محمد الأول فوجدة، وفواحد لوقيتا حس براسو ماشي مزيان ومشا إدير عملية جراحية، بعدها مات وخرج من لكلينيك جثة هامدة.
وأضافت نفس المصادر، أن الهالك مشاو باش إحطوه فالفارابي بعدما هزوه ف سيارة إسعاف، غير أن المسؤولين نتاع الصحة رفضوا يتسلموه، وهاد الشي اللي خلاهم ياخذوه لكلينيك آخر باش إديروا ليه سكانير، بعدها ردوه للمصحة ومات.
وحسب المعلومات اللي كيتوفر عليها "كود"، فان الكنيسة الكاثوليكية الاسبانية بالناظور، هي اللي تكلفات ب مصاريف العلاج نتاعو وخلصات عليه 65 ألف درهم.