كوبل بقاو 4 شهور مربوطين مع بعضياتهم بسلسلة باش يعتقو علاقتهم و ف اللخر فشلو! – فيديو

كوبل أوكراني سميتهم ألكسندر كودلاي وفيكتوريا بوستوفيتوفا، قررو أنهم يربطو بعضياتهم لمدة 3 شهر باش يعتقو علاقتهم اللي مخربقة، لكن في الأخير مصدقاتش ليهم القضية وعلنو أنهم غادين يتفارقو.
الثنائي بقاو 123 يوم رابطين بعضياتهم، لكن اختارو هاد الويكاند باش يهرسو القفولة قدام كاميرا التلفزيون الوطني اللي تبعات قصتهم.
الكوبل شاركو، في صفحاتهم على مواقع التواصل، كيفاش دوزو حياتهم مع بعضياتهم وحتى كيفاش كانو كيتناوبو على الطواليط.
كودلاي (33 عام) وحبيبتو بوستوفيتوفا (29 عام)، قالو أن هاد الفترة اللي بقاو فيها مع بعضياهم، وخصوصا مربوطين بديك الطريقة، زادو تأكدو أنهم ماصالحينش لبعضياتهم.
المرا قالت أن أكثر حاجة توحشاتها في هاد الأشهر هي المساحة الشخصية ديالها، وماشي كلشي تديرو وهو معاها.