ها العبث: حتى الافتتاح مهرجان السينما ودارو فيلم للاساتذة المتدربين اللي كانو معتصمين فجامع لفنا: فاجئاتهم القوات العمومية مع الوحدة الصباح وتكرفسو عليهم وشي مشى للسبيطار

غير سالا افتتاح مهرجان الفيلم الدولي بمراكش بقصر المؤتمرات وتعشاو الضيوف وبدا فيلم اخر ديال بصاح وخايب. غفلات القوات العمومية الاساتذة المتدربين اللي كانوا معتصمين فجامع لفنا هادي مدة. بدا طردهم حسب مصدر ل"كود" مع الوحدة ديال الصباح وبقات المطاردات وشد لي نعك ليك والصداع فساحة جامع لفنا والنواحي حتى الثالثة. طردو حوالي 250 استاذ كان معتصم قبل حتى تنظيم "كوب 22". كيفاش بقاو فهاد الساحة كاع هاد المدة حتى البارح عاد عاقو وكالو ليهم شكون كال ليكم تعتاصمو. حسب مصدر "كود" فالاساتذة بغاو يحتجو البارح السبت وباش حسو باللي البوليس عاق بيهم اجلوها اليوم الاحد.
اش هاد العبث. النهار الاول كانوا يمنعوهم ويسالي الفيلم. حتى بدا مهرجان الفيلم ديال بصاح اللي كيدير افلام فالساحة وكيجيو نجوم يقدموها تماك عاد خافت الدولة على صورتها. عرفات باللي الاساتذة المتدربين غاديين يستغلو هاد التقديم باش يصعدو.
المطاردات غضبات كلشي. كانت بالليل وصدعو الناس اللي ساكنين بسبب المطاردات والمتدربين اللي دوزو ليلة كحلة وكاين اللي كملها فالسبيطار. طبعا حتى اعضاء القوات العمومية ما غاديش يعجبهم الحال.
فيلم واقعي كان كيجري البارح فافتتاح مهرجان سينمائي. الغريب ان هاد الفيلم الواقعي دار على حساب مهرجان الفيلم السينمائي