مللي تلاقاه وهو متكي وحاط راسو على الطبلة.. دفاع الريسوني كشف طبيعة المشاكل الصحية اللي كيعاني منها

أكد دفاع الصحافي المعتقل سليمان الريسوني، من بعد ما زالو اليوم فالحبس، ان حالتو الصحية ماشي تالهيه، بناء على فحوصات دارها لبارح.
الدفاع خبر مرات الريسوني، خلود مختاري، بشنو عند راجلها، وقال ليها أن الفحوصات أكدات أن عندو اختلال فمعدل "الكيرياتنين" بسبب طول مدة إضرابو عن الطعام، وهو مؤشر سلبي على اختلال وظائف الكلي.
وزاد طبيب المؤسسة السجنية، كيف ما نقلات المختاري على حسابها ف"فيسبوك"، نقلا عن دفاع الريسوني، أن بروفيسور معروف وصا الريسوني جراء هذشي بشرب الماء بزاف، حيت هذشي يقد يديرلو مشاكل فالكلي.
وكاين عن الريسوني كذلك اختلالات فمنسوب البوتاسيوم القائم دائما، واللي يقدر يأدي للسكتة القلبية، مع العلم أن سليمان فالأصل طيعاني من ضغط الدم المرتفع، كيف ذكر نفس المصدر.
وقالت المختاري ان سليمان كيواجه ضغوط من المؤسسة السجنية باش ياكل التمر، وهو كيرفض، بالرغم من إلحاحهم.
وخسر الريسوني 32 كيلو، 5 منها غير فالحراسة النظرية، والريسوني دابا تجاوز 60 يوم ديال الإضراب عن الطعام، ومنين قابل الدفاع ديالو اليوم وهو متكي وحاط راسو على الطبلة من كثرة العيا.
https://m.facebook.com/story.php?story_fbid=961465234655029&id=100023746840914