الطبيب الجزايري اللي مشا مع براهيم غالي لسبانيا باش يتعالج مشكوك فهويتو.. لقاو عندو نفس الإسم ديال طبيب مات ف2010

مازال ما تأكد واش حتى هو زور وراقيه أو كاين غير تشابه فالأسماء والمعطيات، دابا حتى الطبيب الدزايري اللي رافق رئيس جبهة البوليساريو، ابراهيم غالي، باش يتعالج فسبانيا، طلع غادي بهوية مشكوك فيها.
وحسب الصحيفة الإلكترونية El Independiente الإسبانية، الطبيب المعني عطى وثائق هويتو لسبيطار سان بيدرو فلوكَرونيو باسم محمد الصغير النقاش، وأنه كيخدم فالسبيطار العسكري بعين نعجة.
والمثير للشكوك فهذ المسألة، حسب الصحيفة ومواقع إسبانية أخرى، هو أن النقاش اللي كان خدام فهذ السبيطار توفى ف2010 فسن 92 عام، وكان تعرف بمعالجتو لضحايا حب استقلال الجزائر.
وببحث صغير على هذ السيد فمصادر رقمية، تبين أنه توفى فعلا فهذ التاريخ، وكان تقلد منصب وزير الصحة عام 1962، وزير للمجاهدين والشؤون الاجتماعية بين 1964 و1965.