داير ما بغا ومامسوق لحد.. ترامب فيه كورونا وغادي مع ناس فطوموبيل صغيرة فاش خرج من السبيطار

انتقادات كثيرة طالت الرئيس الأمريكي دونالد ترامب، بسبب ظهورو، من بعد خروجو من السبيطار، فطوموبيلتو الصغيرة والضيقة، مع مجموعة من الناس خرين، واخا فيه كورونا.
وبان ترامب فطوموبيلتو وهو داير كمامة وكيشير بيديه من الكرسي اللوراني، وسط موكب طوموبيلات كان كيساينو يخرج اليوم الاثنين من مركز والتر ريد الطبي العسكري نواحي واشنطن.
وبسبب هذ اللقطة بزاف دخليهم الشك فواش ترامب بصح مصاب بكورونا، وإلا فخص كَاع اللي كانو معاه يديروهوم فالحجر الصحي لمدة 14 ليوم، للتاكد من خلوهم من الفيروس، وإلا غينقلوه لعائلاتهم.
وقال الدكتور جيمس فيليبس، الطبيب فالسبيطار نفسو، فتويت ليه: "هذا انعدام مسؤولية مذهل !!".
لكن فردو على هذ الانتقادات، قال جود دير، الناطق الرسمي باسم البيت الابيض، ان هذ العملية تدارت بموافقة الأطباء، وخضعات للاجراءات الاحترازية الملائمة، كيف ماتمش اعلام الصحافيين بموعد خروج ترامب باش مايتعادى حد.
وكان ترامب علن، الجمعة اللي فات فتويتر، عن إصابتو بكورونا هو ومرتو، ومن بعد هزوه لسبيطار، وعاودو علنو على خروجو بعدما استقرات الحالة ديالو الصحية.