شوهة وزارة الصحة.. الوزير السابق الدكالي دار كونطرا مع فرقة مسرحية معروفة باش يديرو عمل على السبيطار.. ومنين جا آيت الطالب نكرهم وكلاهم فرزقهم.. مصدر من الفرقة ل"كود": هادو ممثلين محترفين وحشومة يتحكَرو وفهاد جايحة كورونا مابقى عندهم حتى مدخول

اتهم مصدر من فرقة جمعية إيسيل للمسرح، وزير الصحة خالد آيت الطالب، بالتهرب من أداء مستحقات الفرقة المالية، بعدما قدمات 50 عرض لمسرحية "فالسبيطار" اللي تدارت بشراكة مع الوزارة فعهد الوزير السابق أنس الدكالي.
وأكد المصدر، فحديثو مع "كود"، بللي الفرقة خدات تسبيق ديال 20 فالمية باش قدرات تدير الديكوراسيون والمونتاج والموسيقى وأمور أخرى تقنية خاصة بالمسرحية، بينما مازال كتسال 80 فالمية من مستحقاتها اللي مازال ماخدات منها حتى درهم للآن: كيقول: "منين مشا أنس الدكالي وجا بلاصتو خالد آيت الطالب، نكرنا، وبدا يشطح فينا، فشهر 12 درنا لقاء مع مدير ديوانو والكاتب العام ديالو اللي قالين بللي غايدير معانا حل، لكن ماشفنا والو، ودابا علاين نكملو 6 أشهر ديال الانتظار".
المصدر نفسو كشف أن أعضاء المسرحية هم مجموعة من الممثلين المعروفين، منهم سعد التسولي، وفاطمة خير، وفضيلة بنموسى، وبنعيسى الجيراري، ومحمد الأثير، وفريد الركَراكَي، وسعيد آيت باجا اللي هو رئيس الفرقة المسرحية، وقال بللي الوضعية المادية لهذ الممثلين صعيبة بزاف ومقصحين، خصوصا فهذ الفترة ديال الحجر الصحي فزمن فيروس كورونا المستجد، اللي الممثلين كَلسو فيه بلا خدمة، بحكم أنهم كاملين عايشين من المسرح.