بسباب وضعيتو "الكارثية".. وزير الصحة عفى مدير سبيطار القصر الكبير

علمات "كود" من مصادر مطلعة بللي خالد آيت الطالب، وزير الصحة، قام صباح اليوم السبت، بإعفاء مدير مستشفى القرب فالقصر الكبير، التابع للمركز الاستشفائي لالة مريم بإقليم العرايش.
وحسب المصادر نفسها، فالإعفاء ديال مدير المستشفى تم بسبب استنكار مرضى "كوفيد 19" اللي كيتلقاو فيه العلاج، بالإضافة لأفراد عائلاتهم، لوضعية السبيطار، من خلال نشر فيديوهات كيفضحو فيها الحالة المكرفصة ديالو، ومن بينهم خو واحد المصابة بالفيروس اللي قال بللي حالتو "كارثية"، وتعامل الأطر الصحية فيه ناقص.
وتكلف مؤقتا مدير مستشفى لالة مريم، إبراهيم شوقي، بإدارة مستشفى القرب فالقصر الكبير بالنيابة.
وللإشارة فالمركز الاستشفائي لالة مريم فالعرايش ومستشفى القرب فالقصر الكبير بجوجهم كيستقبلو مصابي فيروس كورونا المستجد فالإقليم، وكاينين فيهم أجنحة ديال العزل حتى بالنسبة للناس المخالطين.