فضيحة كبيرة هذي. المستشفى الجهوي فطنجة مشلول بسبب إصابة موظفيه.. وخدماتو توقفات باستثناء ليرجونس

علن مدير المستشفى الجهوي محمد الخامس بطنجة على تعليق الخدمات اللي كيقدمها السبيطار، باستثناء خدمات ليرجونس، بسبب ظهور حالات للإصابة بفيروس كورونا المستجد فالاطر الصحية.
وقال المدير، فالإعلان، اليوم الاثنين، أن "الانشطة الطبية والجراحية غير العاجلة توقفات مؤقتا، وماغاتستأنف حتى لإشعار آخر، وهذشي حفاظا على سلامة العمال والمرتفقين".
وحسب ما كانت تداولات مصادر محلية، تصابو 9 ديال الناس فالسبيطار، وكيتعلق الأمر ب5 اطباء سبيسياليست، و4 ممرضين، اللي خرجات نتائجهم إيجابية، اليوم فالصباح.
ومع شل خدمات السبيطار اليوم، المديرية الجهوية دالصحة خاصها تلقى حل للمواطنين اللي كيقصدو السبيطار طلبا فالعلاج من أمراض كتتفاوت خطورتها، واللي غتولي صحتهم وحياتهم مهددة بسباب هذ القرار.