إلى حين صدور الخبرة النفسية.. المحكمة أجلات محاكمة المرا اللي لاحت ولادها من الطبقة الرابعة

أجلات محكمة الاستئناف فكازا محاكمة المرا اللي لاحت ولادها من الطبقة الرابعة فالعمارة اللي كتسكن فيها بحي الأناسي حتى ل16 من هذ الشهر، واللي تابعاتها النيابة العامة فحالة اعتقال بتهمة محاولة القتل العمد.
سبب التأجيل جا بحكم أن دفاع المتهمة طلب مهلة لانتظار نتائج الخبرة النفسية الطبية اللي تدارت على المتهمة، على اعتبار أن عندها اضطرابات نفسية خلاتها تلوح ولادها بلا ماتحس، والنتائج يمكن تثبت مسؤوليتها الجنائية من عدمها.
وأكد الدفاع بللي المتهمة كتعاني من حالة اكتئاب حاد دفعات بيها لمحاولة الانتحار فالسجن.
والتمس دفاع المتهمة مهلة لاستكمال إعداد الملف كذلك، وقدم طلب للمحكمة من أجل استدعاء الشهود فالقضية قبل الشروع فمناقشتها.
والعام اللي فات، لاحت المتهمة ولادها من الشرجم ديال البرطمة ديالها فالطبقة الرابعة، وهذشي خلاهم يتصابو بجروح بليغة نعسو بسبابها فالسبيطار لأشهر طويلة.