هادشي لي وقع راه غير مغاربة حسو بالملل وبغاو يدخلو للمدينة لي أصلا في الأوقات العادية كيدخلو ليها قانونيا ودوك البراهش غير جاهم الفضول باش يشوفو مدينة مغربية محتلة ويصيلو الرحم بخوتهم تما

سكان تطوان والنواحي حتى لبني حسان كيدخلو لسبتة غير بالباسبور، لي مجاورين لسبتة غير بلاكارط ناسيونال، بزاف منهم راه خدمتهم هي داخلين خارجين لسبتة كيعرفوها بحال حومتهم وبحال كيف كيعرفو الناظوريين مليلية، لي معروف هو أن القاصرين مكريجعوهمش لذا فهاد جوج مدن غادي يلاحظ أي واحد هجوم ديال القاصرين من شحال هادي، إييه أوروبا راه فيها الخدمة والحياة المزيانة راه أوروبا هاديك عادي أن أي واحد يبغي يهاجر ليها من كاع بلدان العالم وكل واحد علاش، الهجرة أصلا حق شرعي للإنسان فين كان الموشكيل سنوات وقرون هادي باش يكون الموشكيل دابا، حنا براسنا راه جايين مهاجرين من قنت آخر، وماشي ديما الجوع والفقر والحاجة هوما أسباب الهجرة، كاين أسباب كثيرة ومتنوعة وكل لما هاجر إليه.
كولشي شاف الشبيبة ديال الفنيدق ناشطين وهوما هاجمين على سبتة عومان، سبتة لي أصلا كانو كيدخلو ليها قبل ماتسد، وسبتة لي باغينها تحل عاوتاني باش ترجع نفس الحالة التهريب والطرافيك والهلاك لإقتصاد البلاد والبلية والغبرة الكحلة والبيضة والشراب مغشوش والفراشة وتبييض الأموال والمصائب الكحلة، والعملة لي كيتشرى بيها التلقيح والدوا تم خارجة من باب سبتة من أجل البيجامات وماروخا والهيروين، الفنيدق ماتت فيه الحركة حاليا وجات مع كورونا، بالإظافة إلى أنه الدراري لي كانو مولفين بالعاقة صحيحة من باب الديوانة راه مستحيل يخدمو بالسميك في المعامل، خاصهم مدة طويلة ديال الحزقة عاد يقدرو يقتانعو، واخا تحل تما منطقة صناعية كبر من ديال كازا راه غادي يجيو غير مكانسة وفاسة وغرباوة وناس الداخل عموما هوما لي غادي يضربو تمارة ويصبرو ليها، ولخريين غادي يبقاو بداك الهدرة ديال ديما العروبية عمرو القنت.
هادشي لي وقع راه غير مغاربة حسو بالملل وبغاو يدخلو للمدينة لي أصلا في الأوقات العادية كيدخلو ليها قانونيا، ربما توحشوها أو توحشو ماروخا، أو غير فضول وزعم اللول وتبعو التاني، راه أصلا بزاف منهم عاودو رجعو سريا كيف مادخلو حسب شهادة الصحفي محمد السعلي من عيد المكان، أما ديك الهدرة ديال إمعات النضال الفايسبوكي وآه من وطن يضحي بأبنائه، وباغين يصورو لينا دوك البراهش بحال الى هاربين من المجاعة والحروب الأهلية، هادوك راه أطفال نقيين بواليدهم عندهم أسر تقدر حقا تكون تضررات جراء إغلاق المعبر، ولكن هذا مكيعنيش أن دوك البراهش هاربين من الجوع، راه غير الفضول وتبيع جيلالة بالنافخ، والرغبة في حياة أفضل لي كاينة حتى عند أطر وأدمغة وناس بيخير عليهم هنا كيهاجرو لأوروبا أو كندا باش يكونوا بيخير عليهم كثر، داكشي ماعيب ماحشومة مكيشوه صورة المغرب، هادوك غير مغاربة جاهم الفضول باش يشوفو مدينة مغربية محتلة ويصيلو الرحم بخوتهم تما.