الاطر الصحية المكلفة بالتلقيح غترجع تخدم فثاني عيد.. ونقابة: الناس ساكنين بعاد وهذشي غيفسد عليهم فرحة العيد وخاص تتراجع على هذ القرار

استنكرات الجامعة الوطنية للصحة، التعليمات الشفوية اللي عطاتها وزارة الصحة للعاملين فمجال الصحة، المشاركين فالحملة الوطنية للتلقيح ضد كورونا، باش يرجعو يخدمو غدا الجمعة مع الصباح.
وقالت الجامعة، فبلاغ ليها توصلات بيها "كود"، أن هذ التعليمات "المفاجئة" فنهار العيد، خلات صدمة واستياء من طرف العاملين فهذشي، الشي اللي نتج عليه حرمانهم من عطلة العيد، والراحة الجزئية، وخسر عليهم وعلى عائلاتهم فرحة العيد.
وقالت أن القرار فيه نوع من الضغوط النفسية والاجتماعية على العاملين، بالإضافة لأن بزاف منهم كاينين فمناطق بعيدة على بلاصة الخدمة، وكانو كيتسناو عطلة العيد باش يرتاحو.
واعتبرات النقابة ان فهذشي "محاولة التفاف جديدة من طرف وزارة الصحة وانفرادها بالتنزيل القسري لمطلب "خصوصية قطاع الصحة" المشروع"، كيف قالت
وطالبات النقابة الوزارة بالتراجع على قرارها.