خاص. السوبرمان وزير الصحة بلوكا المهمة الاستطلاعية حول صفقات كورونا اللي دار بالملايير ورفض يعطي الوثائق لنواب الأمة.. ومصدر ل"كود": الوزير داير راسو فوق المحاسبة

علمت "كود" من مصدر موثوق، أن وزير الصحة خالد ايت الطالب، رفض الرد على مراسلات المهمة الاستطلاعية البرلمانية المؤقتة حول الصفقات التفاوضية التي أبرمتها الوزارة خلال مرحلة الحجر الصحي.
وحسب معطيات "كود"، فإن أعضاء المهمة الاستطلاعية اجتمعوا يوم أمس لمناقشة "البلوكاج" الذي فرضه وزير الصحة على المهمة، حيث عرقل مسار لجنة التحقيق البرلمانية.
وأكدت مصادر "كود" أن وزير الصحة رفض يعطي وثائق الصفقات التي أبرمتها الوزارة مع عدد من الشركات المحظوظة إبان فترة تدبير الجائحة.
المعطيات الحصرية اللي جابت "كود" تفيد بلي كاين بعض البرلمانيين دايرين الوساطة بين اللجنة والوزير، وكيبرر رفض ايت الطالب يعطي الوثائق ب"حساسية الوثائق المتعلقة بهاد الصفقات".
برلمانيون اعتبرو بأن هاد التصرف دليل على "احتقار" المؤسسة البرلمانية اللي من مهاهما الأساسية الرقابة.
دبا باش ميتحرجوش البرلمانيين، دارو تخريجة لهاد التوريطة اللي كتعني نهاية المهمة الاستطلاعية، تخريجة هي يعطيو مهلة للوزير لعل وعسى يجاوبهم على المراسلات اللي بعثو ليه.
المهمة الاستطلاعية سرية، وثائقها ومعلومات غير متاحة للعموم، ولكن "عرقلة" المهمة ماشي سري، كولشي كيهضر عليه فدواليب الوزارة والبرلمان.
الوزارة دارت صفقات فيها شبهات كثيرة، "كود" كشفات الكثير من الشبهات خصوصا صفقة المصل السيرولوجي اللي فازت بها شركة ماستر لاب المحظوظة اللي كولشي
كيعرف تاريخها وكيفاش خدات صفقة اخرى بطريقة استغرب منها عضو فلجنة المختبرات لللي هضر مع "كود".
من غير هاد الصفقة، كولشي شاف كيفاش دخلات الأمصال بلا شهادة التسجيل. بلا الهضرة اللي تقالت فمجلس النواب مرارا حول لوبي كيتحكم فالصفقات بالوزارة.
برلماني كيتساءل فحديثو مع "كود" :"شكون كيحمي الوزير، وعلاش ثايق فراسو بزاف لهاد الدرجة، وميمكنش البرلمان يتهان بهاد الطريقة".
واش ايت الطالب سوبرمان. راه بحال هادو اللي كيسببو لينا الكوارث بحال فاجعة طنجة.. عدم محاسبة ومحاكمة بحال هاد المسؤولين غايوصلنا للكوارث.