واخيرا المورال المغربي غادي يطلع مزيان. سبقنا الدزاير وجنوب افريقيا فالڤاكسان ومعاه لبلاد كلها غادية تنفس والمغربي يفتاخر براسو مرة اخرى

بداية التلقيح فالدول ما بقاتش عملية للوقاية من جايحة غريبة غامضة متحولة. ولات اكثر من ڤاكسان. دخل التسابق عليه عالميا وولى وصولو دليل على تقدم الدول واهتمام حكامها بشعبهم. فالمغرب بعد تأخر اسبوع واللي داز علينا كثر من عام٬ غادية توصل طيارة كافية باش تلقح اكثر من مليون مغربي اليوم الجمعة 22 يناير 2021 فحدود الجوج ديال الظهر.
من المتوقع يبدا اللقاح غدا للاطر الطبية ولا تعطل نهار الاحد. وصول الطيارة غادي يكون بداية انفراج كبير فالمغرب. لبلاد كلها غادية تنفس. الاقتصاد غادية تبدا ترجع فيه الروح. الاكثر من هادا المورال الجمعي ديالنا كمغاربة غادي يطلع. فاحداث بحال هادي وباش تكون انت الدولة الاولى فافريقيا للي غادية تبدا تلقيح مليون شخص٬ كتخليه تشعر باللي انت الطوب فهاد القارة.
المغرب باش سبق الجزائر ومعها جنوب افريقيا راه حقق انتصار معنوي كبير عليهم. سبقناهم فهادي غادية تكون مزيانة لشعبنا بزاف وخايبة ليهم بزاف. مساكن يالله جاتهم ضربة كبيرة قبل اسابيع باش اعتارف الرئيس الامريكي السابق دونالد ترامب من خلال مرسوم ثم تبعته اتفاقية ثلاثية مغربية اسرائيلية امريكية٬ اعتراف ب"مغربية الصحراء". هادي لعبات مزيان باش المغربي يحس براسو. يفتاخر ببلادو. يشعر بالاعتزاز للانتماء لهاد الدولة اللي عندها تاريخ طويل.
دابا فالديور فالزناقي فالسواق فالكيران فالطاكسيات فالعروبيات فالجبال فالمدن حتى ديك 5 مليون مغربي اللي على برا٬ كلهم كيشعرو فالفخر. كنا اول دولة فافريقيا درنا الفاكسان ضد كورونا فيروس. جبناه رغم الحروب لكبيرة والمضاربات غير المسبوقة. بحال ايلى خرحناه من فم السبوعا. السبوعا هما الدول الاكثر ترفيحة فالعالم اللي عندها كاع الامكانيات باش تشريه.
بعد فترة المغرب غادي يكون دار التلقيح لعدد اكثر من اللي دايراينو فدول متقدمة بزاف. هنا علاش قلنا راه المورال الجمعي المغربي طالع مزيان ومعاه بلاد كلها غادية تخرج من هاد الكآبة اللي دارتها كورونا فيروس فكاع المجتمعات. بلاد ايلى غاديين نخرجو بلاد اخرى غير خاص يكون مع هاد الخرجة قرارات اخرى تخلينا ندوزو من مرحلة لمرحلة.