سكوب. هادا خبار يهز المورال فهاد الفترة. المغرب كيصنع 2 مليون كمامة يوميا ف3 لوزينات وغير للاستهلاك الداخلي دابا وبقاو فديوركم باش نبداو نصدرو

الحركة الاقتصادية فالمغرب ماشي كلها واقفة. اللي محرك عندو اولوية خاصة. دابا اوربا عندها خصاص رهيب فالكمامات اي الماسك. فهاد الفترة بدات 3 شركات مغربية انتاج هاد النوع المهم.
وفق مصدر رسمي ل"كود" فان المغرب ينتج اليوم 2 مليون كمامة. هاد الشركات الثلاث كتنتج هاد العدد. مهم بزاف.
دابا كاين شركة من هاد الشركات الثلاث قالت باللي وجدات دابا 10 مليون كمامة.
هاد الشي وقف مصدر "كود" محتاجينو فالبلاد. محتاجينو فالصبيطارات للاطباء للفرملية للمستخدمين للصيادلة لرجال القوات العمومية من جيش ودرك وامن .... لرجال السلطة لللي كيخرج برا.
هاد العدد ممكن يكون كافي ايلى هاد لمغاربة بقاو فديورهم. وايلى الوضعية الوبائية بقات مزيانة ماشي بعيد المغرب يبدا يصدر فهاد الكمامات لاوربا اللي قريبة منا.
اسبانيا محتاجاه بزاف بزاف وايطاليا كذلك وفرنسا وكاع اوربا محتاجين هاد الشي وكلهم كيتسناو الصين ترسل ليهم طلباتهم ايلى المغرب وجد هاد الشي غادي ينفع اقتصادها ويهز المورال الجمعي ديال لمغاربة