اش وقع ف 2020. خلاو التمثيل وقلبوها "روتيني اليومي".. ممثلات دخلو ليوتوب وعالم الڤلوگينگ

كيفما كنعرفو جميع، كورونا فشلات بزاف ديال المشاريع والمخططات لي كانو الناس العاديين مخططين ليها، وحتى الفنانين لي الدومين ديالهم كلى العصا بزاف.
بعض الأسماء المشهورة ولي عندها جمهور متبعها في مراقع التواصل، ختارت وقت الأزمة ديال كورونا تدخل عالم اليوتوب وتصوير الروتين اليومي باش يدخلو شوية ديال الفلوس يروجو الحركة.
من بين هاد الأسماء، الممثلة نرجس الحلاق لي مستقرة في كندا وختارت يوتوب باش تشارك مع الناس حياتها خارج المغرب، وحملها، وحتى ولادتها، زيد عليها شاركاتهم حتى البكا والدموع ملي توضر ليها القط ديالها.
الاسم الثاني هي دنيا بوتازوت لي ساكنة مع راجلها في البرتغال وختارت تشارك في قناتها داكشي لي مرتبط بخدمتها وشنو كتصور وشنو كدير في نهارها.
هدى صدقي من جهتها، اختارت تبين الحداكة ديالها وتصور منها الفلوس وركزات على الطبخ والماكلة والشهيوات.
المخرجة والممثلة سناء عكرود بدات شي أيامات في قناتها على يوتوب، ولكن قررات وبدون شرح توقف وتبقى تشارك كتاباتها غير في حسابها على انستكَرام.
الاسم الأخير هي الممثلة سكينة درابيل لي دارت قناة وحطات فيها كواليس الأعمال لي كتدير باش تقرب جمهورها منها كثر، لكن داكشي متمشاش ليها وحبسات.