اش وقع ف 2020.. بزاف ديال المشاهير المغاربة تصابو بكورونا وتشافاو

دخلات ها 2020 "مباركة مسعودة" على العالم كامل بجايحة كورونا لي قاس الناس في العالم كامل، وطبعا حتى المشاهير.
وعندنا في المغرب، أول ضحايا فيروس كورونا كانت فاتي جمالي، لي نشرات نتيجة التحليلة على حسابها في انستكَرام، وتلقات الدعم من المتتبعين ديالها، وفي الاخير برات منو.
سناء المرحاتي، كانت حتى هي من الفنانين لي جاتهم كورونا، وكانت نشرات على حسابها في انستكَرام نتيجة التحليل، وخضعات للحجر الصحي قبل ما تعلن الشفاء ديالها من الفيروس.
سعيد الناصيري حتى هو كان دار البوز أيام إصابتو بكورونا، خصوصا أن الناس كذبوه، وقالو انه غير بغى يدير الإشهار لمصحة خاصة، ولكن الخبار مؤكدة، فعلا تصاب بالفيروس.
الرابور حليوة حتى هو شارك مع المتتبعين ديالو خبر إصابتو بفيروس كورونا، ومازال كيتعالج منو للآن.
رجاء بلمير حتى هي كانت آخر فنانة علنات إصابتها بفيروس كورونا في شهر 10 لي فات، ولكن فضلت أنها تقول الخبر للمتتبعين ديالها حتى تتعالج وتولي مزيانة.
ولائحة المشاهير لي جاتهم كورونا طويلة، منهم لطيفة رأفت، ووالدتها، وأحلام شرف الدين، وبد هاري وريدوان ومراد القادري والدوزي واشرف حكيمي ونور الدين امرابط وزيد وزيد.