اش وقع ف2020. منهم نجاة عتابو.. 5 ديال الفنانات علنوا على الطلاق ديالهم هاد العام

كيفما دخلات سنة 2020 على العالم بالمصايب بحال جايحة كورونا، كاين فنانات مغربيات دخلات عليهم بالطلاق، وقرروا ينهيو حياتهم الزوجية لأسباب كتخصهم.
ومن بين الفنانات لي طلقوا في 2020 الممثلة مريم باكوش، لي طلقات من راجلها من بعد مدة قليلة على زواجهم، وعلنت على الخبر بطريقة غير مباشرة، وفضلت تستمر في الحياة بلا صخب أو مشاكل.
أيضا، طلقات المغنية هاجر عدنان من أب ولدها، لي عاشت معاه سينين، وهادشي لاحظوه المتتبعين ديالها في حسابها على أنستكَرام، لي كتشارك فيه غير تصاورها ويومياتها مع ولدها.
هدى سعد حتى هي نهات زواجها مع راجلها رضا، لي كيخدم نائب وكيل الملك بابتدائية مراكش، ولي تزوجات بيه هادي سنوات وولدات منو ولدها الوحيد فارس.
الفنانة نجاة اعتابو حتى هي علنات هاد العام على طلاقها بشكل نهائي من راجلها ومدير أعمالها مراد، لي رافقها في السينين الأخيرة في مسيرتها الفنية، وهاد الخبر كان دار ضجة على مواقع التواصل الاجتماعي، خاصة وان طليقها نفى وقال انهم مازال ماتفارقوش.
أيضا، الممثلة سناء عكرود، كانت علنت بشكل ودي للمتتبعين ديالها إنهاء حياتها الزوجية، مع راجلها الممثل محمد المانوزي، ولكن من بعد علنو بجوج الرجوع لبعضياتهم، على حساباتهم في انستكَرام.