شاركو فيها ناس قلال.. السلطات منعات وقفة التريتورات والنكَافات.. والكاتب العام دالممونين ل"كود": حنا كنا ضدها من الديبار وبغينا نحلو المشكل بأسلوب "حضاري"

كانو التريتورات والنكَافات وصحاب الريسطورات والسرباية معولين يديرو وقفة احتجاجية بقواعدها اليوم الجمعة قدام ولاية الجهة فساحة الحمام، لكن الوقفة صدر فيها قرار المنع وشاركو فيها ناس قلال بزاف.
واخا هكذاك جاو شي ناس يشاركو فالوقفة، وبانو تالفين وماحافظين لا شعار لا جوج، بحكم أن القيادات المسيرة للوقفة كلها تقريبا تغيبات عليها.
وماداروش التريتورات والنكَافات الوقفة ديالهم فين كان مقرر تنظيمها، ونزلو شوية داروها فساحة الأمم المتحدة، حدا الطرام، وفرفعو رايات صغيرة دالمغرب.
وفتصريحو ل"كود"، قال حسن الدوش، الكاتب العام للفدرالية المغربية لمموني الحفلات وعضو بالمكتب الكونفدرالية المغربية لمهن الفم، أن هذ الوقفة الفدرالية كانت ضدها، وطالبو العمال باش ميشاركوش فيها كَاع، حتى قبل ما يصدر قرار المنع.
وزاد كيقول أن الفيدرالية دارت اجتماع مع برلمانيين، وCGM وغرفة الصناعة والتجارة والتكوين المهني، وتواصلو معاهم باش يلقاو حلول بأساليب "مهنية وحضارية"، كيف سماها هو، باش يتم دعم القطاع ويستفد كلشي بلا صداع.