رابت الحفلة. الامتحانات تلغات فجامعة الحسن الثاني فكازا غير ساعات قبل انطلاقها

بلاغ جامعة الحسن الثاني اللي طاح فنص الليل، مباشرة بعد بلاغ الحكومة، لغى الامتحانات اللي كانت من الممكن تبدى غير لغدليه، بحيث كانت تبروكَرامات فكليات الآداب عين الشق وبنمسيك ولافاك دالسيونس فكازا بين 7 حتى ل13 شتنبر 2020، بينما الكليات الأخرى فكازا والمحمدية وسطات حتى هوما كانو غيدوزو الامتحانات الربيعية فنفس البيريود.
والحفلة دابا رابت، بحيث كان كلشي معول يدوز الامتحانات اليوم الاثنين، بعدما توصلو جميع الطلبة ديال الإجازة والماستر فالإمايل ديالهم ببروكَرام الامتحانات المؤجلة اللي غتكون يوميا من ال9 حتى ل5 وربع دالعشية، بينما توصلو طلبة الدكتوراه باستدعاء الحراسة، حتى تلغى كلشي.
ولبارح الحكومة صدرات بلاغ كتعلن فيه إغلاق جميع مداخل ومخارج كازا، كيف أكدات ان اسواق القرب غيوليو يسدو فيها دابا مع 3، والقهاوي مع 9، وإلغاء الدراسة الحضورية واستئناف الدراسة عن بعد فجميع المؤسسات لمدة 14 يوم، لتفادي انتشار فيروس كورونا المستجد، بعدما عرفات المدينة بؤر وبائية كثيرة رفعات من الإصابات اليومية فيها.
ورئاسة جامعة الحسن الثاني، بعد هذ البلاغ، بدورها علنات على تأجيل الامتحانات ديال الدورة الربيعية على 14 ليوم.