إشاعة على وفاة سعاد صابر. رشيد الوالي خرج يكذب: عيطت ليها.. هي بيخير وبنفس الحماس القديم.. وباركة من ترويج الفايك نيوز -تدوينة

إشاعات مواقع التواصل الاجتماعي حول وفاة الممثلة سعاد صابر كتسيركولي مزيان ودايرة حالة من لبارح وكاين اللي تيقها.
بمجرد ما وصلاتو هذ الأخبار، الممثل رشيد الوالي اتصل بيها باش يتأكد، ولقاها على خير وبيخير، كيقول: "أخبار كاذبة عن موت سعاد صابر دفعاتني للاتصال بها مباشرة وجاوباتني ضاحكة وقالت: الله يهديهم.. حشومة نقول ليهم انا باقة عايشة".
وزاد فمنشور ليه فأنستكَرام، رفقو بصورة ليه مع الممثلة "المهم سعاد اليوم بخير وبنفس الحماس والروح تستقبل من يسأل عنها".
وختم تدوينتو بالقول: "الله يطول عمر فنانتنا وفنانينا كاملين لأنهم أعطاو من جهدهم وشبابهم لامتاع المشاهد".
واحتفظ الوالي فالمنشور بالصورة، اللي كتب عليها "لا تنشرو الاشاعات عافاكم.. سعاد صابر كتسلم عليكم"، لكن مسح التعليق بمجرد ما حطو، ممكن حيت بغا يموديفي فيه شي حاجة.