الفزازي وزوجته والداودية وجها لوجه بسبب أغنية عطيني صاكي

خلقت كلمات «عطيني صاكي»، الأغنية الجديدة للفنانة الشعبية هند الحناوي المعروفة بلقب «زينة الداودية»، الجدل في ظرف أقل من أسبوعين من طرحها في الأسواق.. أزيد من 3 ملايين و500 ألف مشاهد لها عبر «اليوتوب».. كل الانتقادات انصبت حول الكلام الذي اعتبره الكثيرون تحريضا مباشرا على الفساد، خصوصا بعد انتشار فيديوهات لطفلات لا تتجاوز أعمارهن خمس سنوات يقلدن الداودية واضعات مساحيق التجميل وحاملات حقيبة يدوية ومرتديات ملابس ضيقة. قبل إجراء هذا الحوار اتصلت «الأخبار» بالشيخ الفزازي وسألته عن قراءته للضجة المثارة حول الأغنية فقدم رأيه في الكلام الذي اعتبره تحريضا مباشرا من المغنية على الدعارة واصفا إياه ب»كلام الساقطات».. زوجته الثالثة الفلسطينية شاطرت الفزازي الرأي ووصفت الداودية ب»البشعة». مباشرة بعد ذلك توجهت «الأخبار» إلى منزل الداودية الكائن بأحد الأحياء الشعبية بالدار البيضاء فأجرت معها هذا الحوار الذي واجهتها فيه، بلا خطوط حمراء، بكل الانتقادات واستقت فيه ردها على اتهامات الفزازي وزوجته لها.


* زينة الداودية.. عطاوك صاكك ومازال؟
(ضاحكة بقوة) الحمد لله.. الذي حببني في هذه الأغنية هو أن كل بنت ستحمل حقيبتها وستخرج منها علبة ماكياجها ستتذكرني.
* لم تجيبيني.. عطاوك صاكك و مازال أو بتعبير أصح: عطاك هاذ الراجل صاكك ولا مازال؟
(تستمر في الضحك) لا.. لا.. أنا صاكي في داري عندي ماتخافيش عليا.
* ولكن أنا كاينة عندك في دارك ومادايراش الماكياج.. علاش كتحرضي النساء يديروه؟
لا.. هذا لا يسمى تحريضا.. حتى وإن لم أكن أضع مساحيق التجميل، الآن، فأنا أضع الكحل في عيني وهذا ماكياج في حد ذاته.. دائما المرأة تسعى لأن تكون في كامل أناقتها وأن تكون مثيرة للإعجاب لا للأطفال ولا الرجالة ولا الدراري الكبار.. أغنيتي دعوة لكل امرأة وبنت بأن تهتم بمظهرها وأناقتها وأن تكون مثيرة ويقولو عليها: «شوفو هاذي شكون.. هاذي هي بنت بلادي المثيرة».
* هل أنت واعية بما تقولين؟.. باغية بنت بلادك تكون مثيرة لآش بالضبط؟
تكون مثيرة للإعجاب..
* بل تريدينها أن تكون مثيرة ل «الغرائزالجنسية».. واش فاهمة بعدا شوية كلام داكشي اللي كتغنيه في «عطيني صاكي»، ولا غير كتغني وخلاص؟
(غاضبة) طبعا فاهماه.. أعوذ بالله من الشيطان الرجيم.. حاشا ولله.. نثير الغرائز الجنسية؟ حاشا والله.. للأغنية الكثير من المعاني من له منطق نقي سيفهمها بنقائها ومن له منطق خاطئ سيأخذها من هذا المبدأ.. وحتى أصحح لكل من انتقد أغنيتي فإنها وضعت في قالب كوميدي.. لقد كان هدفي هو تجاوز المرحلة التي بلغت إليها هنا بالمغرب إلى أخرى وأن أعرف عربيا وأن لا يبقى اسم زينة الداودية محصورا فقط في المغرب وتونس وليبيا بعد أن حققت ذاتي في الراي والشعبي.. لذلك فكرت في اختيار أغنية شعبية عصرية لا تتجاوز مدتها ثلاث دقائق ونصف.. «باش يقدر يسمعها أي واحد».. عندما رأيت أن ابنتي التي لا يتجاوز سنها أربع سنوات تقبلتها وحفظتها بكل سهولة أحببتها وغنيتها.. بل إن الأغنية حفظها وغناها حتى الأطفال الآخرون في المغرب وخارجه.
* تبارك الله والصلاة على النبي عليك.. يا زين ما علمتي للأطفال.. يديرو الماكياج ويهزو الصاك ويلبسو الدجينز مزير.. ألا تلتفتين لكل هذه الانتقادات؟
(منزعجة) الانتقادات يا أختي هي التي أنجحت الأغنية.. شكرا.. شكرا.. شكرا لكل من انتقدني لأنني بصراحة لم أكن أتصور أن تنجح أغنيتي بهذا الشكل.. والله عالم شحال أنا فرحانة.
من نيتك فرحانة زعما؟
فرحانة.. فرحانة.. فرحانة بزاف والله عالم اللي في قلبي.
* واش فرحانة لأنك أفسدت أخلاق الطفلات؟
(غاضبة) حاشا ولله.. من نيتي فرحانة مللي أي بنت صغيرة غادي تقلدني وتدير الماكياج في نهار عاشوراء.. أليست هذه هي تقاليدنا وعاداتنا؟.. أتمنى أن تطلق أغنيتي للأطفال غير في عاشوراء «باراكة عليا».. عطيوها صاكها غير نهار عاشوراء وطلقو ليها شعرها وغادي تماكي ومللي يجي نهارها لكبير مللي تزوج تماكي مع خاطرها.
* ولكن في أغنيتك أللا زينة.. كتقولي ليها لبسي وعكري وتزيري.. وسيري للقهوة طلقي «لويفي» وشاطي مع راسك؟
أنا أقول: خلوني نعيش حياتي.. نتسارى نجلس في كافي.. أنا كنهضر على راسي.. ماشي على البنات الصغار.
ولكن الطفلات كيشوفو راسهوم فيك.. ماشي حشومة عليك تفسدي ليهوم أخلاقهوم؟
(غاضبة) مللي تكبر هاذ البنت غادي تفهم وماغاديش تسنى الداودية تقول ليها آجي سيري للكافي.. الحمد لله المرأة المغربية امرأة وقادة وهذا يتعلق بالتربية «اللي كاينة في قاع البيت» حاشا ولله باش نفسد ليهوم أخلاقهوم.
* قلتي هاذ الأغنية عجبات بنتك؟
نعم.. عجبات بنتي أميرة الله يخليها ليا.
* شحال في عمرها؟
أربع سنوات.
* تبغي بنتك تدير الماكياج؟
ماكاينش مشكل ولكن مللي تكبر.
* علاش ماتقبليش على بنتك تدير الماكياج وفي نفس الوقت فرحانة مللي شفتي بنات في عمرها دارو الماكياج وكيقلدوك؟
لست مسؤولة عنهن.. لديهن أسر وعائلات.. أنا قلت الواقع.. واش ماكايناش البنت كتمشي دايرة الماكياج في الزنقة وكيتبعها شي واحد وكيقوليها: «الله يخليك بغيت نهضر معاك، راه نيتي صادقة».. اللي نيتو خايبة ما يسمعش لأغنيتي.. صافي سالينا.. اللي باغي ينتاقدني خاصو يسمع الجواب ديالي ويسول مراتو حيث هي كتماكي.
* ولكن هاذ الراجل ماغاديش يقبل مراتو تخرج للزنقة وتدير حالة في الرجالة؟
لا..لا.. تدير حالة فيه هو لأنه راجل.. لأنه سيطالبها دائما بأن تكون جميلة.. شحال من راجل كيقول لمراتو أنت ماكي غير شوية.. ديها في حالتك.. المرأة المغربية بغيتها تكون «طوب في الأناقة».. بغيتها تدخل لشي عرس ولا شي سهرة ويقولو: «واو شوف هاذ المرأة شحال غزالة وتثيرهم بماكياجها».
* خاصها تثيرهم بجمالها الطبيعي لا بالماكياج؟
* وعلاش أنت دايرة الماكياج؟
أضعه من أجلي أنا.. «ماشي باش ندير حالة في الرجالة»، كيفما كتقول أغنيتك؟
* وعلاش كتديري الماكياج؟
* وعلاش أنت مامتبعاش زينك الطبيعي وكتديري الماكياج عندما تقابلين الجمهور.. إذن هدفك تديري حالة في الرجالة اللي كيحضرو سهراتك؟
شوفي أنا أغنيتي غنيتها في قالب كوميدي واللي نيتو ناقصة هو اللي غادي يفهمها غلط.. لم تجيبيني علاش كتديري الماكياج؟
* أنا لا أضع مساحيق تجميل صارخة مثلك أنت.. ماكياج خفيف.. وأضع القليل منه، في بعض المرات؟
هذا اعتراف أمام جمهورك.
* لا جمهور لدي آزينة.. أنت هي النجمة والمفروض فيك أن تحترمي هذا الجمهور؟
(غاضبة بشدة) أنا لست نجمة أنا محبوبة وأحترم الجمهور .. النجمة كتكون في السماء.
* إذن أنت لا تثقين في نفسك؟
لا.. شوفي يقال: حرمت عليكم قول أنا وأنا وأنا.. أعوذ بالله من قول أنا.
* ولماذا تقولين من الصباح: «أنا أغنيتي..».. أنا.. أنا؟
(غاضبة) لأنني أجيب على أسئلتك.. أنا إنسانة ضعيفة من تحت يد الله.. شوفي آ أستاذة واخا نفوت العالمية كنبقى مغربية بنت الشعب وضعيفة من تحت يد الله.
* طيب، لنناقش بهدوء كلمات أغنيتك: ماذا تقصدين ب «ندير حالة في الرجالة»؟
عندما أقول «ندير حالة في الرجالة» خاصهوم يكملو الكلام: «كلشي يغوت يا لغزالة».. بغيت بنت بلادي تكون في غاية الجمال ديالها ومن هذا المنبر أقدم تحياتي لسلمى المغربية الفائزة بلقب ملكة جمال بمصر «هاكذة بغيت بنات بلادي يكونو جميلات وأنيقات».
* جميلات وأنيقات نعم.. ولكن مايديروش حالة في الرجالة؟
لا..يديرو حالة في الرجالة.. اللي شافهوم يفتتن بجمالهن.
* ها أنت تعترفين بخلق أغنيتك الفتنة؟
(منزعجة) عبارة: «نديرو حالة في الرجالة» فرضتها قافية كلمات الأغنية لا غير حتى تتلاءم مع كلمة «آلغزالة».. الرجالة أنا أقصد بها كذلك أطفالا صغارا ومتوسطين وكبار.. مثلا تقدري تكوني في عرس ودخلتي أنت تبارك الله عليك زوينة.. راه تقدري تديري روينة في العرس.
* هذا عذر أقبح من الزلة.. تديري حالة حتى في الأطفال الصغار؟.. واش عارفة آش كتقولي؟.. أنت بغيتي تخلقي الفتنة وخلاص؟
(غاضبة) لا.. حاشا ولا يتمثل نخلق الفتنة وأنا تاريخي يشهد أنه لم يسبق أن غنيت أغنية خالية من الحياء.. عندما قلت «حالة في الرجالة» فهذا فقط غير باش نغني فقط.. أنا قصدت ب «حالة في الرجالة» باش أي وحدة كتكون زوينة راه كتمنى تتزوج هاهي غادية في الطريق جا واحد يقول ليها: أختي بغيت النمرة عافاك.. بغيت العنوان ديالك.. بغيت نجي للدار.. انا نيتي سليمة.. هاهي دارت فيه حالة بلا ما تحس.. حنا ما قلنا حتى شي حاجة فيها العيب.
* إذا كان واحد نيتو سليمة وباغي النمرة باش يتزوج.. العشرات باغيينها باش يتفلاو ويتحرشو جنسيا بالبنات؟.. آش داك لهادشي كاع؟
لا هذا معنى خاطئ ومن يأخذ به تفكيره هو كذلك.. لماذا لا يفكر بأن الفتاة التي تكون واضعة للماكياج ويلتقي بها في زفاف أو سهرة فسيقول لها: «أنا نيتي سليمة وأريد الزواج بك».. كيفاش بغيتيه يدوي معاها إذا ماطلبش منها النمرة؟.. بغيتيه ينزل عليه الوحي؟.. هو بغاها وعجباتو حيث شافها زوينة وشافها نقية.. وحيث شافها بالماكياج.
* وما شفتيش إذا شافها النهار الأول بالماكياج وصباح الدخلة تصدم بوجه آخر من بعد ما تحيدو؟
شوفي أنا أي مغربية هي جميلة في عيني بالماكياج وبدونه.
* وعلاش ما غنيتيش على الجمال الطبيعي؟
أنا غنيت على الجمال الطبيعي.. عندما أقول: عطيني صاكي باغية نماكي.. راه تقدري تديري غير كحيلة.. ماشي بالضرورة: الروج والفوندوتان وما إلى ذلك.. راه كاينة تبارك الله اللي كتدير غير كْرِيمْ بسيط وكتبان أجمل امرأة في العالم.
* طيب شنو قصدتي ب«حالفة حتى نوض روينة»؟
أنا ممكن نكون في عرس ونوض روينة بكمانجتي.. وقد سبق أن غنيت: «الليلة نروبلها».. وقد قصدت: «نروبلها بالنشاط والفرحة ونوض الحماس في بلاصة تكون هادئة ويبان ليا كلشي كيشطح.. هاذي هي الروينة ديالي هاذي هي الروبلة ديالي».. عندما أدعو صديقاتي إلى السينما أو إلى مطعم وأقول لهن: فلنخرج جميعا اليوم «حالفة حتى نوض روينة»، فهذا لا يعني بالضرورة أن قصدي سلبي بل «روينة إيجابية» ونحن نريد الخروج من أن أجل أن نستمتع ونضحك.. والدليل أن فيديو كليب الأغنية سيصحح لكل واحد فهم أغنيتي خطأ.. واللي كينتاقدوني راهوم كيزيدو يشجعوني.
* كيزيدو يشجعوك ولا كيزيدو يصدموك؟..
* هناك من رفع ضدك دعوى قضائية بالتحريض على الفساد؟.. حتى هادشي كيشجعك؟
* ما معنى التحريض على الفساد؟
واش عندك مشكل مع اللغة العربية؟..زعما كتشجعي البنات يخرجو للزنقة؟
* لماذا لم يتم قبول هذه الدعوى قضائيا؟..
لأن هذا كله كلام في الريح.
* من قال لك إنها لم تقبل قضائيا؟
لأنني لم أتوصل بأي استدعاء.
* مازال جاياك في الطريق الاستدعاءات؟
* مرحبا وألف مرحبا عارفة راسي آش كنسوى.. أغنيتي فرضت نفسها ولا تزال.. خلال مدة 15 يوما خلقت كل هذا الجدل.. أقول لكل من انتقدها استمروا في انتقاداتكم.. «أنا بغيت غير صاكي ونماكي» ماطلبت حتى شي حاجة أخرى. شاهدها عبر اليوتوب في أسبوعين 3 ملايين و500 ألف واحد.. إذا لم تنجح أغنيتي لماذا حققت هذه النسبة غير المسبوقة في المشاهدة؟.. يا الله جاوبيني آ الأستاذة؟
* مجرد فضول، فقط.. عدد ممن شاهد الأغنية سمع عنها وأراد اكتشافها.. لا يعني ذلك أبدا أنه أعجب بها؟
(غاضبة) فضول؟.. إذا كان فضول، غادي تكون لا تتجاوز 500 ألف.. الانتخابات نفسها لا يصل فيها المرشح، في هذه المدة الوجيزة، لهذا الرقم القياسي الذي حطمناه.. الحمد لله الجمهور يثق في زينة الداودية.. أنا بنت دارنا ومربية وكنعرف اللي كاين ما بيني وبين اللي خلقني.. حاجة وحيدة بس.. بغيت البنت تكون زوينة ونقية وفي غاية الجمال.. وتكون غزالة.
* تكون زوينة ونقية وغزالة متافقين معاك.. ولكن ماتديرش حالة في الرجالة؟
لا.. تدير حالة في الرجالة وكلشي يغوت يا لغزالة.
* آ زينة!.. آالداودية!.. واش فاهمة بعدا: «ندير حالة في الرجالة».. هذا معناه تثير شهواتهم الجنسية؟
(غاضبة) لا..لا.. لا.. المغاربة رجال الحمد لله.. بلا مانفيقهوم أنا.. زعما كيتسناو من زينة الداودية تفيقهوم وتثير شهواتهم الجنسية؟.. الحمد لله غير النفس ديالهوم كتخلع.. كلهوم فحولة ورجال، من الواليد الله يرحمو وجبد.. الراجل راجل بلا ما يتسنى زينة الداودية ترجلو.. حنا كنعتزو بتمغربيت ديالنا والحمد لله أنا مسلمة وعربية وبنت الشعب وبنت دارنا وبنتكوم مانديرش شي حاجة اللي فيها العيب.
* دابا أنت بنت داركوم كيفما ما كتقولي.. ماحشمتيش قدام الواليدة ديالك.. زعما ماعندك عائلة تحشمي منها؟
(غاضبة) أنا الحمد لله.. الأم ديالي الله يخليها ليا كتيق فيا وعارفة أنني ماغاديش ندير شي حاجة ضد الواقع المغربي.. خليهوم يمشيو يشوفو الكلام الخايب اللي كاين في الأغاني الأخرى.
* تقصدين بذلك الحاجة الحمداوية؟.. آش بغيتي عندها مسكينة عايرتي ليها أغانيها في شي تصريح؟
لا..لا.. لا.. لم أنطق باسم الحاجة الحمداوية في أي تصريح.
* ألم تنتقدي أغنيتها «با حسن بشوية.. أنا عزبة لوالديا»؟
الحاجة الحمداوية على راسي وعينيا وكنموت عليك آ الحاجة.. ولكن لما كنا أطفالا كنا نرى آباءنا يسمعون أغاني تتضمن كلاما «عيب أننا نقولوه الآن»، ولكنه لم يثر آنذاك جدلا لأن نيتهم كانت صافية.. أغنيتي عادية في قالب كوميدي.. مشات لواحد الإيقاع جديد.
* مالقيتي غير الإيقاع الخليجي؟
لا.. إنه إيقاع غربي.
* هناك إجماع على أنه إيقاع خليجي لدرجة أن خليجيين حفظوها وبدؤوا يتغنون بها في العلب الليلية؟
لا.. ميزان الأغنية هو غربي.. درت فيها البندير والكامانجة والبيانو.. شوية غيرت في الميزان.. هاذي راها غير أغنية كل واحد يفهمها كيفما بغا.
* عاجبك الحال دابا أنهم كيشطحو عليها في العلب الليلية؟
ماعرفتش واش كيشطحو عليها لأنني ما كنمشيش ليها.
* نعلي الشيطان آ زينة عمرك مامشيتي ل «البواط» زعما؟..عمرك ماغنيتي فيها؟
نعم، في أوروبا أغني في العلب الليلية أما الآن لم يسبق أن غنيت عطيني صاكي هناك.. لذلك فأنا لا أعرف صداها لدى الجمهور.. صبرو عليا حتى نشوف ونقول ليكوم شنو كاين.. وأكررها أنا لم أقصد الإساءة أنا بنت مربية ومسلمة وكنعرف حدودي مع الله سبحانه وتعالى.
* الغريب أنك كتذكري بزاف الدين والله؟
أعوذ بالله من الشيطان الرجيم.. علاش مانذكرش الله؟ أنا مسلمة.
* ممكن نسمعوك درتي الحجاب وعتازلتي الغناء في خطرة؟
وعلاش لا.. أتمنى أن أموت فوق سجادة وفي الكعبة.. لا أتمنى الموت وأنا مغنية.. أنا مسلمة تربيت في بيت مسلم.. بنت عربية ومغربية.. الله الوطن الملك.
* هل هذا اعتراف ضمني منك أن الفن حرام؟
لا أقول إن الفن حلال أو حرام.. ولكني أتمنى أن يأتي اليوم الذي أمنح فيه وقتي كله لسيدي ربي.. وقد سبقني لهذا التصريح فنانون كبار ولم يعتزلوا، بعد، لم لا أكون أنا سباقة لذلك وأعتزل بعد أن أضع الحجاب.
* إذا عتازلتي باش غادي تعيشي؟
أنا عايشة بالله وميسورة الحال الحمد لله.
* ميسورة من عائدات الفن؟
لا.. الحمد لله عائلتي لاباس عليها.
* عائلتك ماغاديش تصرف عليك من بعد هاذ العمر كلو؟
الحمد لله ماعندناش ماخاصناش.. حنا ولاد الشعب وبنات الشعب المغربي.. نقدرو نعيشو بالخبز وأتاي وكافيين خيرنا شرنا.. الحمد لله.
* زعما من بعد حياة الثراء هاذي اللي ولفتيها ترجعي تاكلي الخبز وأتاي؟
زينة الداودية ماشي ثرية وماكتجمعش لفلوس.
شنو كتديري بفلوسك.. الإحسان زعما؟
داكشي بيني وبين الله وماغاديش نقولها حتى لشي حد.
* ماعندكش زعما حتى شي مشروع؟.. قهوة؟ مطعم؟ مثلا.
أنا ماكندير حتى شي مشروع.. ما يهمني هو طريقي مع الله سبحانه وتعالى .. من يثق في فهو كذلك.. سواء استمريت في الغناء أم لا.. أريد أن أقول: عمركوم تاخذو أغنية من إنسان مبدأ.. عطيني صاكي لها شاعر الذي هو محمد الإدريسي وملحن هو محمد الرفاعي.. الكلام لست أنا من كتبه.
* هل أنت متأكدة من أن كلام الأغنية هو من إبداع الشاعر محمد الإدريسي؟.. أليس كلاما مسروقا؟
هناك رقابة ونقابة آ الأخت.. حنا ماكنلعبوش.
* وما قصة الشابة الجزائرية خيرة التي اتهمتك بسرقة كلمات أغنيتها؟
الشابة خيرة سبق أن غنيت لها أغنية: «فيك أنت كنت دايرة الثقة» هي حبيبة ديالي كنا تلاقينا في وهران ماعندي معاها حتى شي مشكل.. اللي احتج هو الشاعر ديالها.. قال شفرنا الأغنية.. وزايدون أنا غنيت الأغنية في سهرة ولم أضعها ضمن ألبومي.. أما عطيني صاكي لها شاعر وملحن.
* هل لديك كامل الثقة فيهما فقد تكون الكلمات والألحان مسروقة؟
لا.. لا يمكن.. هناك حقوق التأليف.. راه ماكايناش السيبة في البلاد آ الأستاذة.
* ماكيناش السيبة في البلاد ولكن كاينة السرقة.. وأنت كفنانة من يكون في الواجهة؟
أنا في الواجهة وأؤكد لك أنه ماكاينة لا سرقة لا والو.. أزيد من 15 يوما والأغنية مطروحة في الأسواق وحتى تكونوا على علم فإنه في حال وجود سرقة فإنك تتوصلين بإعلان من النقابة خلال 48 ساعة.. وأنا أقول لجمهوري اصبروا وستشاهدون كليب الأغنية الذي سيفاجئكم وستكتشفون، من خلاله، المقصود من الأغنية.
* متى صورت الكليب؟
صورته قبل طرح الأغنية.
لماذا لم تطرحي الأغنية وهي مصورة كليب حتى تتفادي كل هذه الضجة، كتموتي على الصداع والمشاكل، ياك؟
(ضاحكة) لا.. لا.. الحمد لله أنا محبوبة عند الجمهور.. والذي جعلني أبحث عن هذا الستيل الجديد في الأغاني هو عندما غنيت مع الستاتي دويتو.. بهذا شعرت أنني حققت ذاتي في الشعبي وأردت الانتقال لأشياء أخرى.
* أين صورت الكليب؟
في الإمارات.
* غنيت عن ابنة بلدك وصورت الكليب في الإمارات.. ما هذا التناقض؟
هذه أول مرة غادي ندير كليب لابد ندير شي حاجة عليها قيمة..
* زعما في بلادنا مايمكنش نديرو كليب بتقنيات عالية؟.. ماعندكش الثقة في بلادك آ زينة؟
لا.. أنا صورت «شدي ولدك يا خالة» في المغرب.. بالعكس أنا كنموت على بلادي وعندي الفيزا فيها عشر سنين كنمشي لأوروبا الجمعة وأعود للوطن الأحد.. كنموت على بلادي.. بلادنا ليست بالشكليات والرسميات والمظاهر.. بلادنا نحبها عندما نقول: الله، الوطن الملك لا بد أن نقولها من قلبنا الخالص.
* لم يسبق أن حصلت على وسام ملكي.. أليس كذلك؟
لا.. مازال ما خديتو إن شاء الله نتمناو على الله.
* ولماذا لم تحصلي عليه لحدود اليوم، برأيك؟
أنا ما بغيت حتى شي حاجة.. أنا بغيت غير سيدنا الله ينصرو يكون بصحتو.. بخير وعلى خير.. والأسرة العلوية بخير وعلى خير.. وشعبنا يعيش في أمان. هذا هو الذي أتمناه.
* هناك من يصفك بفيروز الأغنية الشعبية؟
(مبتسمة) نعم يصفونني بذلك.
* فيروز غنت: «أعطني الناي وغني».. وأنت غنيت «عطيني صاكي باغية نماكي»؟
(ضاحكة) والمرحومة أم كلثوم غنت: «أعطني حريتي أطلق يدي».. كل واحد كيغني على اللي عجبو.. والستاتي كيقول: عطيني الفيزا والباسبور.. أعطني الناي وغني أغنية عربية لم لا الداودية تغني أغنية لها وزن كبير ويرددها كل العرب؟
* أكيد أنك لا تتحدثين عن «عطيني صاكي»، ماعندها وزن كبير ما والو؟
(غاضبة) الحمد لله أغنيتي خلقت نجاحا كبيرا لم يسبق أن خلقته أغنية مغربية أخرى بل خلقت هزة أرضية.
* بلى.. خلقتها أغان أخرى أفضل بكثير من أغنيتك؟
* عطيني مثال؟
* «أنت باغية واحد» لسعد لمجرد، مثلا؟
زيديني شي أغنية أخرى.
* حسبني طماع لحاتم عمور؟
(تدير عينيها تعبيرا عن عدم رضاها دون أن تعلق).
* لماذا أدرت عينيك ألم تنجح، برأيك، أغنية حسبني طماع؟
(ترد وهي تدير عينيها) بالعكس أنا غنيت حسبني طماع مع حاتم عمور في دوزيم.
* مازال كتدوري في عينيك.. أغنيتك عاجباك بزاف على «أنت باغية واحد» و»حسبني طماع»؟
طبعا غادي تعجبني راها أغنيتي.. لو لم تنجح ماغاديش تجي عندي لداري باش تديري معاي هاذ الحوار.
* دخلتينا لدارك وبغيتي تندمينا؟
(ضاحكة) بالعكس مرحبا وألف مرحبا.. مادا بيا الشعب المغربي كلو يدخل لداري.
* من الذي نجحت أغنيته أكثر أنت أم سعد لمجرد؟
الذي نجح أغنية لمجرد هو الكلام.. وتحدث عن الواقع.. حتى هو مسكين هاجموه ولكن الأغنية الحمد لله ضاربة وفينما مشيت كنسمعها، الله يكمل عليه.
* ومن فيكما أغنيته أفضل من الآخر؟
الجمهور هو الحكم لست أنا.. سعد لمجرد أخي الصغير وأتمنى له التوفيق.
* تقولين سعد لمجرد أخي الصغير، فكم عمرك؟
أنا من مواليد 1979.
* علاش صغرتي من عمرك عامين، معلوماتنا تقول إنك من مواليد 1977، هل يشكل لك العمر عقدة؟
(ضاحكة) لا.. غير للا خديجة مديرة أعمالي الله يخلف عليها هي اللي زادت ليا عامين في عمري في ويكيبيديا.
* لماذا اخترت أن تكون مديرة أعمالك امرأة لا رجل، عزيز عليك لعيالات؟
إيوا الصراحة كان لدي مدير أعمال رجل هو زوجها الذي أصبح فنانا مشهورا هو الفنان موس ماهر.. الحمد لله لأنها موجودة إلى جانبي في هذه الفترة.
* حتى أختم معك هذا الحوار أريد أن أواجهك بتصريح خص به فقيه دين «الأخبار» بخصوص أغنيتك، فهل تقبلين سماعه؟
نعم أق