بسبب كورونا.. أكبر صال فالمغرب سدات واعتذرات لكليانها.. جاو السلطات ولزمو عليها تسد وعطات للتاس 10 الدقايق باش يدوشو ويمشيو بحالهم

السلطات المحلية فكازا دارت على ليصال كاملين كتطالبهم باش يسدو فخطرة، وحتى لإشعار آخر، بسبب ارتفاع حالات الإصابة بفيروس كورونا المستجد فالمدينة.
وحسب ما عاينات "كود"، لبارح وحدة من أكبر ليصال فالمغرب، وصالات خرين كثار، كانو حالين ما عليهم ما بيهم، حتى وقفو عليهم السلطات المحلية مع الربعة دالعشية ولزمو عليهم باش يسدو، وهكذا إدارة ليصال عطات لزبناءها 10 دقايق باش يجمعو حوايجهم ويمشيو فحالهم.
وهذ لاصال نيت دارت اليوم السبت إعلان، كتخبر فيه الزبناء ديالها بأنها غتسد بشكل نهائي، امتثالا لقرار السلطات المحلية القاضي بإغلاق كَاع ليصال فكازا ابتداء من اليوم السبت 22 غشت 2020.
وغير هذي يوماين ماكاملاش، ومن بعد ماراج بلاغ مكتوب باللغة الفرنسية ومنسوب لوزارة الداخلية، كيتكلم على إغلاق ليصال والحمامات وكَاع الأماكن والحدائق العمومية، هذ لاصال اللي عندها فروع كثيرة فالمغرب دارت بلاغ كتاكد فيه للزبناء ديالها على أنها غادي تبقى حالة بشكل اعتيادي، باستثناء الفروع ديالها فطنجة اللي سادين وكيتسناو الموافقة ديال السلطات، ودابا هذ البلاغ تم الحذف ديالو، وتعوض ببلاغ الإغلاق اللي تنشر ليوم.