من بعد السائحة الإيفوارية.. مغربية تلكَا ليها واحد وتحرش بيها وتكرفص عليها فكازا – فيديو

من بعد السائحة الإفوارية مريم اللي خرجات بفيديو مؤخرا كتحكي فيه على معاناتها مع التحرش، لبارح لاحت مغربية كذلك فيديو كتتكلم على معاناتها كذلك مع هذ الآفة، بعدما تلكَا ليها مجهول فالطريق وتحرش بيها وتعدا عليها بالضرب منين بغات توقفو عند حدو.
حفصة، صورات فيديو نشراتو فالموقع الإلكتروني “وي لوف بوز” قبل ما يتعمم على صفحات مواقع التواصل الاجتماعي، كتقول فيه بللي كانت غادية تشد الطوبيس فعين السبع فكازا، بعدما خرجات من الدار مع 11 ديال الصباح باش تمشي للافاك فالمحمدية، واعترض طريقها واحد خونا، وضربها فالمؤخرة ديالها، هي مارضاتش ودفاعتو بالجهد، وهو ماعجبوش الحال.
كتقول حفصة، وهي كتحاول تحبس البكية، بللي هذ السيد بدا يضرب فيها بشكارة كان هازها، حتى بدات كتغوت وكتقول للناس يجيو يعتوقوها، لكن حتى واحد ما سمعها وعاونها، فماكان عليها غير تجبد التيليفون وتصور خونا اللي كاع مكان مسوق، وحبس الضرب ديالو ليها، ومشا بحالو.
ديكلارات حفصة عند البوليس بهذ الشخص اللي وراتهم تصويرتو، وحكات ليهم آش وقعلها معاه، قبل ما تفقد الأمل وتقرر تدير فيديو.
وغير هذي يومين، سائحة إفوارية فأكادير حكات فالفيديو، اللي نشراتو على “فيسبوك”، قبل ما يتبارطاجا على نطاق واسع فكَاع مواقع التواصل الاجتماعي، كيفاش تهجم عليها واحد السيد، وتبسل عليها، قبل ما يحبس عليها الطريق ويآمرها باش تهضر معاه صحا، هي حاولات تتفاداه بدون جدوى، حتى بدات كاتغوت باش يعتقوها منو الناس، لكن حتى واحد ماداها فيها.