بالفيديو.. عطاتو علاش كيقلب.. إعلامية لبنانية مرمدات السعودي اللي عاير المغرب

ردات الإعلامية اللبنانية رويدة مروة على الصحافي السعودي اللي عاير المغرب مؤخرا، وقال بللي اقتصادو كيقوم على السياحة الجنسية، وقالت بللي "أي واحد يقدر يدخل لكَوكَل ويقلب شوية على المغرب باش يعرف بللي اقتصادو مبني بشراكتو مع أقوى الدول الصناعية فالعالم، زيد عليها صناعة السيارات، والطاقة الشمسية الأكبر والأضخم فالعالم، بالإضافة لاقتصاد الموانئ والثروة السمكية".
الإعلامية المهتمة بالثقافة والشؤون المغربية، واللي تكلمات بالدارجة ففيديو ليها حطاتو فالصفحة ديالها ف"فيسبوك"، قالت بللي هذ الكلام ما يمكن يصدر غير من غبي ومكبوت مولف يشوف المجلات الإباحية، وأكدات بللي بحال هذ الناس "وعموم الخليجيين اللي كيتكلمو على السياحة الجنسية فالمغرب، كيجيو للمغرب لكن كَاع ما كيمشيو للبلايص السياحية الفخمة باش يساهمو فالسياحة المغربية، بالإضافة إلى أنه فيه مناظر خلابة وجبال وبحار، وكيعتمد على سياحة ركوب الأمواج والاستكشاف، والقطاع السياحي مزدهر على مستوى المطاعم الفخمة والكَاسترونومي والفنادق المصنفة، بالإضافة لسياحة الاستثمارات.
واعتبرات مروة بللي هذ النوع دالخليجيين "كيجيو باش يقلبو على الرخص حيت رخاص"، وكيتكلمو على الدعارة فالمغرب فالوقت اللي الداعرة كاينة فمجموعة من المدن الخليجية اللي كتعرف اتجار حقيقي فالبشر.
وأكدات بللي المغرب واخا يسد بابو "عمر ناسو تموت بالجوع حيت كاين محصول وفير، ويمكن للناس تزرع وتاكل وتصيد من البحر أحسن أنواع السمك، بالإضافة لأن الدولة فرقات الفلوس على المحتاجين، وعاد كاين تضامن اجتماعي بين أفراد المجتمع، حيت المغاربة كيحسو ببعضياتهم مزيان.
وكان خرج واحد الصحافي سعودي هذ الايام سميتو فهيد الشمري بفيديو كيتكلم فيه على انهيار السياحة فدول الطرابيش، فإشارة لمصر ولأردن والمغرب، واللي قال فيه بللي المغرب غيتأثر بزاف فهذ الفترة ديال الحجر الصحي اللي تسبب فيه فيروس كورونا المستجد، بسبب تأثر سياحتو الحنسية اللي كتذر عليه ملايير الدولارات.
فيدو اللبنانية كاملا من هنا: https://web.facebook.com/watch/?ref=external&v=579261296046131