نصائح وزارة الصحة. كورونا تقدر تنتقل فالحمامات واللي عندهم عوامل الاختطار مايمشيولهاش.. وواخا تلبس الكمامة إلى كان صاحبك مادايرهاش وفيه الفيروس يقدر يعاديك

حذر معاد المرابط، منسق المركز الوطني للطوارئ العامة بوزارة الصحة، من ذهاب الناس الكبار واللي عندهم أمراض مزمنة أو ضعف فالمناعة من الذهاب للحمامات، على اعتبار أن الحمام من الاوساط اللي ممكن ينتشر فيها فيروس كورونا بشكل كبير، حيت مغلق والتهوية فيه ضعيفة وكاين تقارب بين الأشخاص.
من جهة أخرى، كشف المرابط، فاستعراضو لأجوبة وزارة الصحة على أسئلة المواطنين، أنه إلى كان واحد داير الكمامة، وصاحبو اللي معاه مادايرهاش، فكاينة احتمالية انتقال العدوى ليه واخا ضعيفة، "وبالتالي من حقو يطلب من رفيقو يدير الكمامة، كيف من حق ارباب المقاهي والطاكسيات والمحلات التجارية يطالبو زبناءهم يديرو الكمامة"، كيف قال.
وفالأجوبة دائما، قال المرابط أن الكمامة المصنوعة من القماش مايمكنش تتستعمل ديما واخا يتم تصبينها، وهذشي على حساب الثوب، حيت كاينة اللي ممكن تتصبن 10 مرات وكاينة اللي ممكن تتصبن 20 مرة وماتبقاش صالحة.
وأكد أن جافيل كيقضي على كورونا وكذلك المعقمات اللي كتحتوي على 70 فالمية ديال لالكول، لكن الخل حتى شي دراسة ما تبتات فعاليتو.
وبالنسبة للي مريض بالربو أو أي مرض مزمن آخر، فعندو فرصة للنجاة إيلا كان مقيوس بكورونا، حيت ماشي جميع الناس اللي عندهم عوامل الاختطار غتظهور الحالة ديالهم.