دابا مع ارتفاع حالات الوفيات بفيروس كورونا المستجد بشكل كبير فالمغرب، وبحكم أننا غير فهذ 13 يوم من شهر غشت سجلنا 168 وفاة، ولا لازم على وزارة الصحة تدير تقرير مفصل على هذ الوفيات، وهذشي اللي كتخطط ليه، وفالقريب غيكون واجد. والتقرير غيكونو فيه تصنيفات دالجنس والفئات العمرية ديالهم وحتى شحال من واحد دخل للإنعاش وشحال كانو كيعانيو من أمراض مزمنة، بالإضافة لتوزيع الوفيات فالأقاليم والجهات. معاذ المرابط، منسق المركز الوطني لطوارئ الصحة العامة بوزارة الصحة، عطا تسريبات ل"كود" بشان إحصاءيات الوفيات، وقال أن الغالبية الساحقة إما عندهم عامل من عوامل الاختطار، والسن ديالهم كبيرة. وقال أن عوامل الاختطار كتتحدد فالأمراض المزمنة بحال السكري أو القصور الكلوي، والأمراض اللي كتضعف المناعة، بالإضافة لأمراض القلب والامراض التنفسية الحادة. وزاد كيقول أن هذشي لا يعني أن جميع الناس اللي كبار فالسن، واللي مصابين بهذ الأمراض، فهم بالضروري غيموتو إلى تقاسو بكورونا، واستحضر فهذ الإطار واحد السيدة كانت برات من كورونا وكانت مريضة وفعمرها أزيد من 100 سنة. والوفيات ولاو يتسجلو بوثيرة خطيرة ومقلقة جدا، بحيث غير البارح المغرب حطم الرقم القياسي فالوفيات اليومية، بحيث سجل 23 وفاة كتتوزع على 6 جهات.
