هذي نصيحة من وزارة الصحة: الما دالبحر ماكاينقلش كورونا ولكن التجمعات الشاطئية فيها خطر.. وتجنبو تخدمو الكليماتيزور فالخدمة

كشف معاذ المرابط، منسق المركز الوطني لعمليات الطوارئ العامة بوزارة الصحة، أن الما دالبحر مكينقل كورونا، "الفيروس مكينتشرش فالبحر، لكن المشكل كاين فتجمع الناس فالبحر اللي مامحتارمينش التباعد الاجتماعي ووسائل الوقاية والحماية اللازمة كالكمامات...".
من جهة أخرى، قال المرابط، ففقرة تفاعل الوزارة مع أسئلة المواطنين، فندوة الحصيلة الوبائية الأسبوعية لفيروس كورونا، أن استعمال الكليماتيزور يقد يساهم فانتقال عدوى كورونا: "الكليماتيزور إلى كنتي بوحدك فالسيارة ديالك أو كنتي مع ولادك فالدار اللي كتعيش معاهم أصلا فممكن تستعمل المكيف، لكن فبلايص الخدمة لا ينصح به".
وإلى كان الكليماتيزور ضروري فبعض البلايص دالخدمة، كيخص، حسب المرابط، "احترام التباعد وارتداء الكمامة، ونحلو الشراجم 2 مرات فالنهار باش نهويو المكان أو نخليوهم محلولين ونشغلو المكيف، لكن من الأحسن مايخدمش".
وحول سؤال أحد المواطنين للوزارة حول ما إذا كان الحجر الصحي غيرجع إلى تزادو الحالات فعيد الكبير، كيقول المرابط : "بغض النظر واش العيد كاين ولا ماكاينش، الحجر ممكن يرجع يدار على بعض المناطق اللي تزادو فيها حالات كثيرة، وهذشي كاين فجميع الدول فالعالم".