كولشي رجع هارب من الصبليون. مهاجر سنگالي نقز السياج دسبتة باش يدخل لكاستييخو فهجرة عكسية

من نهار بدات كورونا، والصبليون كيتصدمو فالهجرة العكسية، لي بدات كتوقع من اسبانيا للمغرب، او من الثغور المحتلة للناظور وكاستييخو.
وبعدما كانت هاد الهجرة العكسية حكر على المغاربة، لبارح تصدمو الصبليون ملي حرك سنغالي من سبتة لكاستييخو.
صحيفة ال فارو دي سيوتا قالت أن عناصر الحرس المدني الاسباني، لي كتحظي السياج الشائك، رصدات واحد المهاجر سنغالي كيحاول يحرك وينقز عبر هاد السياج لكاستييخو، رغم أنه دازت عليه كحلة باش يدخل لسبتة.
وأضافت الصحيفة أنه لحدود الساعة مامعروفش علاش كان باغي يحرك، ولكنها أول مرة توقع شي مهاجر من دول جنوب الصحراء يهرب من اسبانيا.