دارت وزارة التجهيز والنقل واللوجيستيك دفاتر تحملات جديدة كيتضمن أهم التدابير اللي خاص صحاب المحطات الطرقية ومقاولات النقل والنقل السياحي يلتزمو بيها، ابتداء من الخميس الجاي فاش غتحل المحطات، وهذشي باش يحدو من انتقال عدوى فيروس كورونا المستجد، فهذ الظرفية اللي كيعرف فيها المغرب الرفع التدريجي ديال حالة الطوارئ الصحية. وقالت الوزارة، فبلاغ ليها توصلات بيه "كود"، أن هذ الدفاتر فيها مجموعة من الإجراءات الوقائية اللي خاصها تحترم،ويتم مراعاتها بدقة والتقيد بها من طرف الشوافرية وصحاب المحطات والعمال فالمحطات والركاب. بالنسبة للنقل العمومي للكيران، ماخاصش تفوت طاقتهم الاستعابية 50 فالمية، وفكل رحلة غتسجل أسماء المسافرين وأرقام ليكارط ناسيونال ديالهم وأرقام تيليفوناتهم، ولاليسط ديال المسافرين غادي تكون فثلاث نسخ: وحدة عند مسؤول المحطة ووحدة عند شباك التذاكر ووحدة عند سائق الحافلة، وغيتم الاحتفاظ بها لمدة شهر. وسفر بين المنطقة 1 و2 غيكون غير بوجود رخصة استثنائية مسلمة من السلطات المحلية لظروف قاهرة، أو بوجود رخصة مهنية. أما بالنسبة لدفتر التحملات المتعلق بالنقل السياحي، فحتى هو غيتحمل من الموقع دالوزارة، وكياكد على تسجيل أسماء وارقام الهواتف وليكارط ناسيونال ديال السياح، والاحتفاظ بيها حتى لشهر فالأرشيف. وكيخص يتم تحميل الدفتر من موقع الوزارة، والتأشير على جميع الصفحات، والتوقيع على الصفحة الأخيرة من طرف الممثل القانوني للمقاولة السياحية أو الطرقية بعبارة "قرئ وصودق عليه وألتزم باحترام بنوده".