رمضان فالدار. لبنى أبيضار ل"كود": كندير الريجيم وكنتهلا فراسي بليماسك والوصفات وكناكل ماكلة صحية.. وتوحشت المغرب.. ففرانسا ريحة الموت عطات بسباب الوباء

كل يوم "كود" كتسول فنانين ومشاهير على كيفاش كيدوزو نهارهم مع الحجر الصحي فرمضان.
واليوم معانا الممثلة المغربية المثيرة للجدل لبنى أبيضار، واللي تكلمات لينا على كيفاش كتدوز نهارها فهذ الفترة اللي كيعرف العالم انتشار فيروس كورونا المستجد، كتقول: "أنا أصلا ديما فشهر رمضان كندير الريجيم وكنطيح شي شوية دالكيلوات، حيت هو الشهر الوحيد اللي كيكون عندي فيع الوقت الكافي، وكندير ليماسك والماساج ونتهلا شوية فالكور ديالي"،
وأكدات أبيضار، اللي مقيمة ففرانسا فهذ الأثناء، بللي عزيز عليها الكوزينة بزاف حيت الهواية ديالها هي الطبخ، ولكن ماكاديرش بزاف ديال الشهيوات المغربية باش تحافظ على الوزن ديالها، كتقول: "كنطيب بزاف دالشهيوات فهذ الفترة، وماشي ضروري الشهيوات المغربية، ممكن كل نهار على حساب الطبيعة، هي الماكلة دالمغرب زوينة وبنينة وكتفكرك فالوالدة، لكن إلى كنتي منفتح على بزاف دالمطابخ العالمية وعرفتيها مزيان، كيبان ليك الطبخ المغربي مزيان غير مرة مرة إلى تشهيتي شي حويجة، حيت الشهوات دالمغرب ماشي كلهم صحيين، والناس اللي كيبغيو يفقدو الوزن بحالي خاصهم ينقصو منها".
وبالنسبة للخروج، كتقول أبيضار بللي ماكاتخرج بزاف، "أنا أصلا ماكيعجبنيش نخرج بزاف وخصوصا فرمضان مكايعجبنيش نخرج كَاع، دايرة الحجر الصحي فرمضان أنا كل سنة كندير الحجر الصحي فرمضان، وهنا ففرانسا الجو كئيب بسبب الوباء ورائحة الموت عاطية، كنت ديما كنمشي للمغرب لكن هاد الشهور الأخيرة الوباء منعنا منو وتوحشتو"، على حساب كلامها.