بعد ما توقفات القرايا بسباب “كورونا”.. وزارة التعليم طلقات برنامج التعليم عن بعد

طلقات وزارة التربية الوطنية والتكوين المهني والتعليم العالي والبحث العلمي، اليوم الاثنين فالصباح، خدمة التعليم عن بعد، من خلال الموقع الإلكتروني http://telmidTICE.men.gov.ma، وعبر القناة الرابعة الثقافية، وهذشي من بعد ما قرر المغرب يحبس القرايا خوفا من تفشي فيروس “كورونا” المستجد القاتل.
وكيفما جا فبلاغ ليها، توصلات بيه “كود”، فبالنسبة للموقع الإلكتروني “تلميذ تايس”، TelmidTice، غادي يتحل مع ال10 ديال الصباح، وغدي يمكن للتلميذ يدخليه بلا “مو دو باس”، وغايلقى فيه مجموعة من الدروس المصنفة حسب الأسلاك والمستويات التعليمية والمواد المدرسية.
الوزارة كتعترف، فالبلاغ نفسو بللي هذ الموقع فالمرحلة ديالو الأولية مغايكونش مزود بكَاع الدروس، وشوية بشوية غادي يتم إضافة المواد اللي خاصين وفق التدرج البيداغوجي.
أما بالنسبة للقناة الثقافية، فبدات كتبث وصلة إخبارية مع 8 ونصف دالصباح، وغيتم إعلان البرمجة ديال الدروس المصورة، اللي غاتبت اول حصة ليها مع ال11 ديال الصباح.
وكتشير الوزارة بللي كيمكن التلميذ يشد القناة من خلال الشبكة الارضية ولا الساتيليت ديال النايل سات، اولا يعتمد على تطبيق SNRTLIVE .
من جهة اخرى، عبرات الوزارة، فالبلاغ ديما، على إشادتها بالمجهود اللي كيقومو بيه الاساتذة والمفتشون والاطر التربوية والإدارية باش ينتجو مواد رقمية ودروس مصورة، وكتدعو فنفس الوقت باش كلشي ينخرط لإنجاح هذ “الورش البيداغوجي الهام”.