بريطانيا.. 10 آلاف مشتبه بإصابتو ب”كورونا” ومسؤولين كينصحو البريطانيين باش يديرو الحجر الصحي سيمانة

مسؤولين فبريطانيا أكدو بللي أكثر من 10 آلاف واحد يقدر يكون مصاب بفيروس “كورونا” المستجد، ولهذشي ونصحو البريطانيين باش أي واحد كان فيه واحد من الأعراض ديال الوباء يبعد على كَاع الناس، ويدير بينو وبينهم ثلاثة ديال الخطوات على الأقل، وهذشي ابتداء من غدا الجمعة.
هذ الإجراءات نصحو بيها المسؤولين فالنكَليز تدار لمدة سيمانة وحدة على الأقل، من خلالها يحاولو ينقصو شوية نسبة العدوى ديال الفيروس اللي انتشر بشكل كبير فالمملكة المتحدة.
ونصحو المسؤوليين البريطانيين يبعدو قدر الإمكان من الناس المروحين، وحتى الناس الكبار فالسن والناس اللي باينة عليهم عندهم مشاكل صحية، لان هذ الناس هوما اللي كيشد فيهم المرض كثر.
المدارس والجامعات لغاو جميع السفريات اللي كينظموها الطلبة للخارج، ولكن الحكومة البريطانية مالغاتش الأنشطة اللي كتكون فيها تجمعات كبيرة.
وكان رئيس الوزراء ديال بريطانيا قال، فتصريح للصحافة، بللي هذي أزمة صحية كبيرة، وممكن تكون الأسوء من شحال”.